24 September 2017

News Flash

‘मूर्ती’पूजा आणि ‘मूर्ती’भंजन

कंपनीने नवीन क्षेत्रे पादाक्रांत करावीत, यासाठी प्रयत्नशील असतानाच सिक्का यांना जाणे भाग पाडल्याने आता

लोकसत्ता टीम | Updated: August 21, 2017 2:14 AM

कंपनीने नवीन क्षेत्रे पादाक्रांत करावीत, यासाठी प्रयत्नशील असतानाच सिक्का यांना जाणे भाग पाडल्याने आता इन्फोसिसचीच कोंडी होणार आहे..

एके काळी काळाच्या पुढे असणारे प्रवासात एका जागी थांबले की कसे मागे पडतात आणि इतरांनाही कसे मागे ओढतात याचे ‘मूर्ती’मंत उदाहरण म्हणजे नारायण मूर्ती. इन्फोसिस या त्यांनी स्थापित केलेल्या कंपनीचे मुख्य कार्यकारी अधिकारी विशाल सिक्का यांनी मूर्ती यांच्या निवृत्त्योत्तर लुडबुडीस कंटाळून अखेर राजीनामा दिला. इन्फोसिसवर ही अशी वेळ येणार हे दिसतच होते. तीन दशकांपूर्वी मूर्ती, नंदन निलेकणी, शिबुलाल आदींनी भारतातील माहिती तंत्रज्ञान क्षेत्रातील पहिली स्वतंत्र महाकंपनी स्थापन केली. त्या वेळी मध्यमवर्गीय आर्थिक आणि सांस्कृतिक वातावरणात वाढलेल्या मूर्ती, निलेकणी यांनी आपापली पुंजी एकत्र करून भागभांडवल एकत्र करून इन्फोसिस घडवली. त्या वेळची ती मोठी घटना. याचे कारण त्या वेळी भारतात उद्योगपती कोणी व्हावे याची एक चौकट असे. उद्योगचक्र मारवाडी, उद्योग घराण्यात जन्मलेला वा पारसी कर्तृत्ववान आदींपुरतेच फिरत असे. पहिल्या पिढीचे उद्योजक त्यामुळे आपल्याकडे कमी तयार होत. माहिती तंत्रज्ञान क्षेत्राने हे सारे बदलले आणि उद्योगविश्वाचे लोकशाहीकरण केले. ही अर्थसांस्कृतिकदृष्टय़ा अत्यंत मोठी घटना. केवळ कल्पना हेच भांडवल या संकल्पनेच्या विकासाची ती सुरुवात होती. ती रुजवण्याचे श्रेय निर्विवाद मूर्ती आणि निलेकणी आदींचे. त्या अर्थाने ते द्रष्टे ठरतात.

पण तेवढेच. हे असे म्हणण्याचे कारण इन्फोसिसचा वृक्ष वाढू लागल्यावर त्याला आहे तसा वाढू देण्यापलीकडे या मंडळींनी काही केले नाही. अन्यत्र, विशेषत: अमेरिका, इस्रायल आदी देशांत नवनव्या कल्पनांचे रूपांतर मोठय़ा प्रमाणावर उत्पादनांत होत असताना इन्फोसिस ही केवळ सेवा देणारीच कंपनी राहिली. बँकिंग व्यवहारासाठी वापरले जाणारे एखादे सॉफ्टवेअर वगळता इन्फोसिसने फक्त अन्यांचे घर, उद्योग, व्यवहार आदी सांभाळण्याचेच काम केले. ती आकाराने वाढली असेल. तिची उलाढाल प्रचंड असेल. तिचा लौकिक उत्तम असेल. पण हे सारे एका मर्यादेपलीकडे गेले नाही. इन्फोसिसच्या यशाने प्रेरित होऊन तरुण अभियंत्यांच्या दोन पिढय़ा माहिती तंत्रज्ञान क्षेत्राकडे वळल्या. या तरुणांना इन्फोसिसने रोजगार निश्चित दिला. एरवी गडय़ा आपुला गाव बरा.. अशा वृत्तीच्या कुटुंबांतील हजारो तरुण/ तरुणींना अमेरिका आदी पाश्चात्त्य देशांत पाठवले. अलीकडे प्रस्थापित सुसंस्कृत घरात डॉलर हा चर्चेचा विषय असतो. अशा घरांतील तीर्थरूप डोक्यावर रंगीबेरंगी टोप्या, बम्र्युडा, डोळ्यांवर रेबॅनचे गॉगल आणि मातोश्री पायांत तीनचतुर्थाश विजारी आणि वरच्या टीशर्टखाली आपले मंगळसूत्राचे सांस्कृतिक संचित लपवत आपल्या चिरंजीवांचे वा सुकन्येचे अमेरिकीपण मिरवत असतात. याचे श्रेय अर्थातच इन्फोसिस आदी कंपन्यांना. या यशामुळे माहिती तंत्रज्ञान क्षेत्रातील कंपन्यांची साखळीच आपल्याकडे उभी राहिली आणि तरुणांच्या तीन पिढय़ा देशाच्या सीमा ओलांडून गेल्या. हे इन्फोसिस या कंपनीचे यश. आणि हीच इन्फोसिसच्या यशाची मर्यादा. याचे कारण या क्षेत्राच्या बदलाच्या अफाट क्षमतेचा कोणताही वापर नारायण मूर्ती आणि संबंधितांनी केला नाही. ते सेवा एके सेवा हेच करीत बसले. त्यामुळे गुगल, फेसबुक, ट्विटर, अ‍ॅमेझॉन, याहू अशांतील एकही भारतात जन्मले नाही. या आणि अशा सर्व कंपन्यांच्या सेवा सांभाळण्याचे काम तेवढे इन्फोसिस आणि अन्यांनी इमानेइतबारे केले. पण स्वत:ची काहीही निर्मिती केली नाही. म्हणजेच माहिती तंत्रज्ञान क्षेत्रातील चाकर तयार करण्यापलीकडे या कंपन्यांच्या हातून काहीही भव्य घडले नाही. हे मूर्ती आणि मंडळींचे थांबणे. माहिती तंत्रज्ञान क्षेत्राची गती बेफाम आहे. या क्षेत्रातील वर्ष हे तीन वा चार महिन्यांचे असते आणि बदलाचा वेग मती दिपवणारा असतो. हे लक्षात न घेता या सर्वानी इन्फोसिस ही माहिती तंत्रज्ञान क्षेत्रातील अभियंत्यांची गिरणी बनवून टाकली.

हे चित्र बदलवण्याची धमक विशाल सिक्का या व्यक्तीत होती. मूर्ती यांच्यानंतर इन्फोसिसच्या संस्थापक सदस्यांकडे या कंपनीचे वडिलोपार्जित पद्धतीने प्रमुखपण आले. त्यात नंदन निलेकणी यांचा अपवाद वगळता अन्यांचे नेतृत्व या क्षेत्रातील आव्हानांच्या तुलनेत सुमार होते. म्हणून इन्फोसिस स्थितीवादी होत गेली. यानंतर तीन वर्षांपूर्वी कंपनीची सूत्रे सिक्का यांच्या हाती दिली गेली. संस्थापक सदस्यांखेरीज अन्य कोणाची या पदावर नेमणूक होण्याचा हा पहिलाच प्रसंग. सिक्का हे रअढ या जर्मन कंपनीच्या संचालक मंडळावर होते. त्या कंपनीचे संभाव्य मुख्य कार्यकारी अधिकारी म्हणून त्यांच्याकडे पाहिले जात होते. तेथून ते इन्फोसिसमधे आणले गेले. मूळ जर्मन पण खऱ्या बहुराष्ट्रीय कंपनीतून एका भारतीय आणि फक्त भौगोलिकदृष्टय़ाच बहुराष्ट्रीय कंपनीत येणे हा त्यांच्यासाठी सांस्कृतिक बदल होता. तसाच तो इन्फोसिससाठीही होता. सिक्का पंजाबी आणि इन्फोसिसचे मूर्ती आणि प्रवर्तक दाक्षिणात्य भद्रलोकीचे. पंजाबी वृत्तीत एक रांगडा उधळा बेफिकीरपणा असतो आणि आव्हाने पेलण्याची आणि नसली तर तयार करण्याची मूलत:च रग असते. ती सिक्का यांच्यात होती. ती त्यांच्या कार्यशैलीतून जाणवत होती. हे मूर्ती आदींच्या शैलीशी पूर्णत: विसंगत होते. अशा वेळी खरे तर या दुढ्ढाचार्यानी सिक्का यांना आणि त्यांच्या बदलत्या संस्कृतीस समजून घेणे आवश्यक होते. ते झाले नाही. मूर्ती यांचे रूपांतर दरम्यानच्या काळात एका किरकिऱ्या, मध्यमवर्गीय म्हाताऱ्यात झालेले असल्याने ते सिक्का यांच्या प्रत्येक मुद्दय़ावर आक्षेप घेऊ लागले. सिक्का यांचे कॅलिफोर्निया येथून बंगलोरस्थित कंपनी हाकणे, कंपनीच्या विमानातून हिंडणे, सहकाऱ्यांना भरघोस वेतन देणे, छोटय़ामोठय़ा कंपन्या विकत घेणे आदी सारे मूर्ती यांना झेपले नाही. ते झेपणारे नव्हतेच. अशा वेळी कालाय तस्मै नम: असे म्हणत हा बदल दूरवरून पाहण्यात शहाणपणा होता. त्याच्या अभावामुळे मूर्ती ज्यात-त्यात लुडबुड करीत गेले. त्यांनी भले काटकसरीने कंपनी उभी केली असेल, परंतु म्हणून पुढच्या पिढीनेही कंदिलात रात्र घालवणे अपेक्षित नाही. ते तसे नसते. मूर्ती यांना ते समजले नाही. आपण स्थापन केलेल्या कंपनीचे हे काय होते आहे.. असे म्हणत ते गळा काढत राहिले आणि सिक्का यांच्यासाठी अडचणी निर्माण करीत गेले. इन्फोसिसच्या कार्यालयात, कंपनीत गालिच्यांची निवड करण्यापासून स्वत:चे स्वच्छतागृह स्वत:च स्वच्छ करण्यापर्यंत सर्व काही मूर्ती स्वत: करीत. परंतु पुढच्या पिढीनेही हे असेच वागायला हवे ही अपेक्षा बाळगणे हे शंभर टक्के चूक. आपल्याकडे मुळात या साधेपणा नावाच्या भोंगळ गुणाचे अवडंबर जरा जास्तच माजवले जाते. मूर्ती यांनी ते अतिच केले.

तेव्हा सिक्का यांना पायउतार होण्याखेरीज पर्यायच राहिला नाही. तरीही त्यांचे मोठेपण हे की त्यांनी कधीही मूर्ती यांच्याबाबत टीकेचे अवाक्षरही काढले नाही. मूर्ती यांची लुडबुड असह्य़ होत आहे हे लक्षात आल्यावर त्यांनी स्वत:च पदत्याग केला. त्यामुळे मूर्ती यांचे लहानपण अधिक मोठे झाले. यातील महत्त्वाची बाब अशी की या प्रकरणात इन्फोसिसचे संचालक मंडळ हे पूर्णत: सिक्का यांच्या बाजूने उभे राहिले. त्या सर्वानी झाल्या प्रकरणाबाबत मूर्ती यांनाच दोष दिला. तरीही मूर्ती यांना आपण चुकलो असे वाटत नाही. सिक्का यांनी इन्फोसिसच्या संस्कृतीवर घाला घातल्याची टीका ते करताना दिसतात. तो घालायलाच हवा होता. कारण संस्कृती ही प्रवाही असते. ती बदलती राहायलाच हवी. ती प्रवाही नसेल तर तिचे डबके होते. म्हणूनच इन्फोसिसने नवनव्या क्षेत्रात प्रवेश करावा असा सिक्का यांचा स्तुत्य प्रयत्न होता. यंत्रमानव, कृत्रिम बुद्धिमत्ता ही ती नवीन क्षेत्रे. त्या दिशेने कंपनीचा रोख बदलण्यास त्यांनी सुरुवात केली होती आणि त्यास यश येताना दिसत होते.

पण मूर्ती यांच्या दळभद्री वृत्तीने आता त्यास खीळ बसेल. त्यामुळे होणारे नुकसान एकटय़ा इन्फोसिसचे नाही. ते भारतीय माहिती तंत्रज्ञान क्षेत्राचे आहे. पिढीच्या संघर्षांत पुढच्याऐवजी मागच्या पिढीचीच सरशी होत असेल तर ते या क्षेत्राला मागे नेणारे आहे. सिक्का यांच्या जाण्यामुळे इन्फोसिसचीच कोंडी होणार असून तिला ना कोणी प्रयोगशील प्रमुख भेटेल ना आता कंपनी बदलण्याचा प्रयत्न होईल. हे दुर्दैवी आहे. याची पुनरावृत्ती रोखायची असेल तर प्रत्येक क्षेत्रातील दुढ्ढाचार्याचे वारंवार मूर्तिभंजन व्हायला हवे. मूर्तिपूजेतून स्थितीवादीच तयार होतात. प्रगतीसाठी मूर्तिभंजनास पर्याय नाही.

 

First Published on August 21, 2017 2:14 am

Web Title: vishal sikka resigns as md and ceo of infosys
  1. P
    Prasad
    Aug 26, 2017 at 12:21 pm
    ५० कोटी लायकी असनारी कंपनी दुप्पट दराने का विकत घेतली हा प्रश्न मूर्ती ह्यांनी विचारला होता . सिक्का व कंपनी ह्यावर अजूनही उत्तर देत नाहीत .
    Reply
    1. S
      satya
      Aug 25, 2017 at 6:06 pm
      बदल हा नेहेमीच चांगला असतो. आणि नंतरच्या पिढीने केलेले सर्वच निर्णय मागच्या पिढीपेक्षा अचूक असतात हा संपादकांचा दुराग्रह आहे. हे नेहेमीच सत्य नसते. एकतर इन्फोसिस मध्ये नेमके काय झाले हे बाहेर कोणालाही माहित नाही. दुसरे सिक्का हे ही जास्तच बेफाम होते. त्यांच्याच काळात एकीकडून तरुण आयटी इंजिनिअरांची मोठ्या प्रमाणावर नोकर कपात झाली, त्याच वेळी कारी संचालक मंडळींचे पगार अवाच्या सव्वा वाढवले गेले. मूर्ती यांनी त्याविरोधात आवाज उठवला तो योग्यच होता. ही हायर फायर संस्कृती आणि उथळ भांडवलवाद भारतात कामाचा नाही.
      Reply
      1. B
        baban
        Aug 24, 2017 at 10:04 am
        लेखकाने एखाद्या ज्येष्ठ आणि आपल्यापेक्षा बरीच जास्त लायकी असलेल्या व्यक्तींबद्दल अशी भाषा वापरणे योग्य नव्हे... किरकिरा, मध्यमवर्गीय म्हातारा, दळभद्री असले शब्द फुकट वाटण्यात येणाऱ्या पाक्षिकांमध्येही वापरले जात नाहीत. आपण तर स्वत:ला नामांकित वृत्तपत्र म्हणवता... असो...
        Reply
        1. 9
          9819838610
          Aug 24, 2017 at 9:48 am
          The words mr.kuber has used to criticise Mr. Murthy are really in a bad taste. I think kuber feels GE knows everything under the sun and has to give his Expert comments on everything. I pity such so called intellectuals.
          Reply
          1. S
            Santosh Sardesai
            Aug 23, 2017 at 12:55 am
            Rough and tough language but its true...
            Reply
            1. S
              Sidharth
              Aug 22, 2017 at 10:50 pm
              हा लेख म्हणजे अतिशय 'घमेंडी' लिखाणाचा एक उत्कृष्ट नमुना. लेखक स्वतःला अतिशहाणा समजतो असे दिसते. कोणत्यातरी सामान्य प्रादेशिक वृत्तपत्रात काम करणार्याने विना माहिती व पुरावा, मुर्तीन्सारख्या कर्तबगार माणसावर बेछूट आरोप करणे म्हणजे गायींना शाप देणारा कावळा. लेखकाने पनाया अक्विझिशन मध्ये झालेल्या भ्रष्टाचाराबद्दल काहीच उल्लेख केलेला नाही, असो तेवढ इंग्रजी झेपल नसेल त्याला.
              Reply
              1. A
                Anthani
                Aug 22, 2017 at 8:28 pm
                सडक्या मेंदूचा सोमनाथ.........
                Reply
                1. N
                  Nandkumar Musale
                  Aug 22, 2017 at 8:21 pm
                  विश्लेषण छान आहे, लेख वाचून असे वाटते कि इन्फोसिस ला आता उतरती कला लागेल.
                  Reply
                  1. N
                    Nishant
                    Aug 22, 2017 at 10:25 am
                    लेख वाचून असे वाटले गावातल्या टवाळखोर टपोरी पोराने टीका केली आहे वरच्या स्तरावर झालेल्या गोष्टींवर काहीही भाष्य करणे गैरसमज करू शकते मुद्दा सत्य काय आहे याचा आहे आणि लेख उगाच हवेत बाण मारले आहेत
                    Reply
                    1. Y
                      yeda
                      Aug 22, 2017 at 10:07 am
                      एक शंका .... हा लेख लिहिणाऱ्याचं शिक्षण किती?
                      Reply
                      1. A
                        Abhay Kulkarni
                        Aug 21, 2017 at 9:55 pm
                        लेखाचा आशय उत्तम, मात्र भाषा खूप खालच्या पातळीची. टीका योग्य, मांडणी खराब.
                        Reply
                        1. U
                          umesh
                          Aug 21, 2017 at 9:44 pm
                          संपादक आधीच ठरवतात आज याच्या बाजूने लिहायचे आणि मग सोयिस्कर समर्थने तयार करतात वास्तविक सिक्का प्रकरण हे संपादकांना झेपणारे नाही कंपनीचे काम कसे चालते याची केवळ ऐकीव माहिती त्यांना आहे असे दिसते खरोखर कंपनीतील इनसायडरने दिलेल्या वास्तव माहितीवर आधारित लेख असता तर ठीक होते हे संपादकीय म्हणजे सकाळी उठून मॉर्निंग वॉक करताना पेन्शनरे जशी उगाचच मतांच्या पिंका टाकत जातात त्या प्रकारचे आहे त्याऐवजी यांच्याच इंग्रजी भावंड इंडियन एक्सप्रेसमध्ये आलेली बातमी कितीतरी वस्तुनिष्ठ आणि पुरेशी माहिती देणारी आहे
                          Reply
                          1. S
                            Swan
                            Aug 21, 2017 at 9:41 pm
                            ब्लॅक एडिटरशिप !!! फक्त भारतात जन्माला आले म्हणून काही पण छापता येते याचे एक उत्तम उदाहरण ! आजवर होता नव्हता तेवढा सर्व विश्वास लोकसत्ता टीम ने या लेखाचे संपादकीय लिहून घालविला . फारच घाणेरडा , आखूड बुद्धीने लिहिलेला , आणि ज्याच्यावर लिहिला गेला त्या पेक्षा ज्याने लिहिला त्याचीच लायकी जास्ती दाखविणारा लेख.
                            Reply
                            1. D
                              Diwakar Godbole
                              Aug 21, 2017 at 9:25 pm
                              उद्योग/सेवा क्षेत्रावरील एका नावाजलेल्या स्थित्यंतर झाल्यावर जुने व्यवस्थापन विरुद्ध नवे व्यवस्थापन ह्या संघर्षात नव्या व्यवस्थापनाची बाजू घेणारे संपादक किंवा अन्य कोणी तुलना अप्रस्तुत म्हणून धुडकावून लावतील पण भारतात असेच स्थित्यंतर राजकीय क्षेत्रात घडले असून जुने राजकीय व्यवस्थापन असेच स्थितिप्रिय झाले होते आणि मुख्य कार्यकारी पद सांभाळत असणारा अधिकारी निष्क्रिय बनल्यामुळे चौखूर उधळलेल्या (२ जी,कोळसा,हेलिकॉप्टर) कार्यांना कार्यांना वेसण घालू शकत नव्हता आणि जनतेने त्यांना हाकलून लावल्यावर आलेल्या आणि वेगळ्या दिशेने देश कारभार करू इच्छिणाऱ्या मुख्य कार्यकारी अधिकाऱ्यांविरुद्ध मात्र हिरीरीने देश खड्ड्यात चालला म्हणून बेंबीच्या देठापासून बोंबलून ओरडा करत आहेत हे केवढे आश्चर्य! अशा अवाढव्य देशात वेगळ्या दिशेने सुरु केलेल्या कार्यक्रमाला पुरेसा अवधी दिला पाहिजे एवढे भान देखील राहिले नाहीच पण वर "इतना सन्नाटा क्यूँ?" असे उद्गार काढतात.
                              Reply
                              1. V
                                Vachak
                                Aug 21, 2017 at 9:22 pm
                                इन्फोसिस ही सर्व्हिस देणारी कंपनी असून ती प्रॉडक्ट बनवणारी कंपनी (गुगल, मायक्रोसॉफ्ट , Apple प्रमाणे) नाही हे जरी खरे असले तरी आज आयटी क्षेत्रात भारतात दुसरी अशी कोणती कंपनी आहे?सर्व भारतीय आयटी कंपन्या ह्या फक्त service provider (आउटसोर्सिंगची कामे करणाऱ्या) आहेत. मुळात भारतात R D नावाची चीज उरलेली नाही. कुणीही मूल संशोधनात, विज्ञानात रस घेताना दिसत नाही. सगळ्यांना फक्त Engineer, Doctor, C.A., I.C.W.A. , C.S. होऊन सात आकडी पगार कमवायचे असतात. म्हणून आता शास्त्रज्ञांना भरपूर पैसे देऊन संशोधनास प्रवृत्त केले पाहिजे जेणेकरून भारत विज्ञानात मोठी झेप घेऊ शकेल आणि बलशाली होऊ शकेल. नाहीतर फक्त रद्दी आणि भंगारातला माल आपल्या गळ्यात पडेल.
                                Reply
                                1. V
                                  Vachak
                                  Aug 21, 2017 at 9:09 pm
                                  तुमचा अग्रलेख एकतर्फी वाटतो. नारायण मूर्तीनी इन्फोसिसच्या कामात ढवळाढवळ करणे चुकीचे वाटत असले तरी त्यांनी हे कंपनीच्या काळजीपोटी केले असावे. आज आयटी क्षेत्रात प्रचंड मंदी आहे, तशात इन्फोसिसमध्ये काही गैरप्रकार वाढीस लागले होते. मग अशा वेळी कोण प्रवर्तक गप्प बसेल? शेवटी हा भारत आहे, अमेरिका नव्हे. काटकसरीचे म्हणाल तर दाक्षिणात्य लोक हे जरा कंजूसच असतात आणि पंजाबी रांगडे, पैसे उधळणारे असतात. मूर्तीनी महात्मा गांधींचा आदर्श डोळ्यासमोर ठेवत कंपनी चालवली. आपले स्वच्छतागृह आपण धुणे हे जरा अतीच वाटते कारण ह्या कामासाठी पैसे देऊन भंगी ठेवता येतो. टाटा समूहाचा महात्मा गांधींबरोबर अशाच काटकसरीच्या मुद्द्यांवरून मतभेद होते. शेवटी पैसे कमवायचे ते खर्च करण्यासाठीच ना? उद्योजकाने आपली बुद्धिमत्ता आणि वेळ व्यवसायवाढीसाठी वापरणे अपेक्षित असते व किरकोळ कामे ही पगारी नोकरांकडून करून घ्यायची असतात.
                                  Reply
                                  1. P
                                    Prashant Gadekar
                                    Aug 21, 2017 at 8:52 pm
                                    असे वाटतेय कि संपादक महोदय कुत्ल्यारी तणावात आहेत आणि लेख लिहित आहेत.काहीतरी लिहून पेपर काळआ करायचे आसे धोरण असेल तर आम्ही पेपर वाचावे के नाही यावर एकदा विचार करावा लागेल.कृपया असे सुमार लेख लिहून अकलेचे प्रदर्शन करू नये.
                                    Reply
                                    1. A
                                      Aniruddha
                                      Aug 21, 2017 at 7:23 pm
                                      सुंदर संपादकीय, सत्य लिहायला धारिष्ट्य लागते, भातात हा आरती ओवाळणारांच्या देश आहे, त्यांना हे कळणार नाही. गुगळे, पेप्सी,मायक्रोसॉफ्ट मध्ये इंडियन ceo आहेत, त्यांच्या कामात असा हस्तेक्षेप कोणी आर्त नाही. हॅट्स ऑफ टू you .
                                      Reply
                                      1. S
                                        Shrikant Yashavant Mahajan
                                        Aug 21, 2017 at 7:20 pm
                                        Restricting pay is not wrong if we restrict India as an operational field where unlike the West there is dearth of talent. Disproprtionate hike in ries being contagenios is highly dangerous to our economy , our IAS like babus too start expecting on same ground, otherwise they wud find jusyification to their inefficiency corruption.
                                        Reply
                                        1. A
                                          AMIT
                                          Aug 21, 2017 at 7:16 pm
                                          उथळ लेख. कंपनीच्या व्यवहाराला अनेक पदर असतात. एकही पदर उलगडून न दाखवता आल्यामुळे वर दिलेली हास्यास्पद कारणे खरडण्यात आली. उत्तर दक्षिण कलह हे कारण तर अजूनच मजेशीर - असे असते तर मूर्ती यांनी सिक्का यांना मुळात ने े तर असते का? सी इ ओ हा काय खेळी मेळित दिली गेलेली खुर्ची आहे असा संपादकांचा गैरसमज झालेला दिसतोय.
                                          Reply
                                          1. D
                                            Dev
                                            Aug 21, 2017 at 6:44 pm
                                            This is extremely refreshing. As for the comments looks like all the IT slaves who owe their livelihood to Mr. Murthy showed up here and decided to spit venom Sikka did what a dignified person would do. As for Murthy less said the better. As for Infosys - looks like it was Bangalore's own sweatshop MNC and would remain so.
                                            Reply
                                            1. Load More Comments