कॉसमॉस बँकेच्या व्यावसायिक, औषध विक्रेत्यांसाठी कर्ज योजना मुंबई : सहकार क्षेत्रातील आघाडीच्या दि कॉसमॉस को-ऑपरेटिव्ह बँकेने व्यावसायिक तसेच औषध विक्रेते यांच्यासाठी दोन नव्या कर्ज योजना सादर केल्या आहेत. ‘कॉसमॉस प्रोफेशनल्स कर्ज योजना’ व घाऊक तसेच किरकोळ औषध विक्रेत्यांसाठी ‘विशेष कर्ज योजना’ अशी त्यांची नावे असल्याचे मल्टिस्टेट शेडय़ुल्ड बँकेचे अध्यक्ष कृष्णकुमार गोयल यांनी घोषित केले. पहिल्या योजनेंतर्गत डॉक्टर, अभियंते, सनदी लेखापाल, कंपनी सचिव, स्थापत्यकार आदींना व्यवसायासाठी पाच लाख रुपयांपर्यंतचे कर्ज वार्षिक १२.५० टक्के दराने तर औषध विक्रेत्यांना दहा कोटी रुपयांपर्यंतचे कर्ज वार्षिक ११.५० टक्के दराने उपलब्ध झाले आहे. २७,३५० कोटी रुपयांहून अधिक एकूण व्यवसाय असलेल्या कॉसमॉस बँकेच्या विविध सात राज्यांत १४० शाखा आहेत. अ‍ॅलिकॉन समूहाकडून आणखी एक संपादन व्यवहार व्यापार प्रतिनिधी, मुंबई पुणेस्थित अ‍ॅलिकॉन समूहातील मुख्य कंपनी आणि विविध उद्योगांसाठी अ‍ॅल्युमिनियम मिश्रधातू साच्यांची (कास्टिंग्ज) निर्मिती करणाऱ्या एलिकॉन कास्टअलॉय लि.ने येथील अ‍ॅटलास कास्टअलॉय लि.च्या कास्टिंग्ज व्यवसाय संपूर्ण प्रकल्प व यंत्रसामग्रीसह संपादित केल्याची नुकतीच घोषणा केली. अ‍ॅटलासच्या सर्व विद्यमान भागधारकांना एलिकॉनचे १२.५५ लाख भांडवली समभाग वितरीत करून ही संपादनाची प्रक्रिया पूर्ण करण्यात आली. अ‍ॅटलासचा प्रति वर्ष ६,००० मेट्रिक टन क्षमतेचा अ‍ॅल्युमिनियम साच्यांचा प्रकल्प चिंचवड येथे असून, कंपनीने त्यायोगे आर्थिक वर्ष २०१४-१५ मध्ये १३७ कोटी रुपयांची उलाढाल नोंदविली, अशी माहिती एलिकॉन समूहाचे मुख्य वित्तीय अधिकारी विमल गुप्ता यांनी दिली. या ताबा व्यवहारातून ग्रीव्हज् कॉटन, रॉयल एनफिल्ड, पिआज्जियो आणि संरक्षण क्षेत्रासारखा अ‍ॅटलास ग्राहकवर्गही एलिकॉनकडे वळेल, अशी त्यांना आशा आहे. मारुती सुझुकीचे ‘एलसीव्ही’ लवकरच पीटीआय, नवी दिल्ली मारुती सुझुकी इंडिया कंपनीने चालू आर्थिक वर्षांत हलके वाणिज्य वाहन (लाइट कमर्शियल व्हेईकल-एलसीव्ही) सादर करण्याचे ठरवले आहे. या वाहनांच्या मागणीत घट होत असतानाही कंपनीने हा निर्णय घेतला आहे. कंपनीचे कार्यकारी संचालक आर.एस. कालसी यांनी सांगितले की, एलसीव्ही वाहन बाजारात आणण्याचा कंपनीचा विचार आहे, सुरुवातीला काही राज्यात व नंतर देशात या वाहनाची विक्री केली जाईल. एलसीव्ही वाहनांची स्थानिक बाजारपेठ कमी होत चालली असताना इतर व्यावसायिक वाहनांची बाजारपेठ थोडी वाढली आहे. मारूती उद्योगाने या वाहनाच्या निर्मितीसाठी वेगळी यंत्रणा वापरण्याचे ठरवले आहे. प्रवासी वाहनांच्या विक्रीबाबत कालसी यांनी सांगितले की, या आर्थिक वर्षांत आम्ही दीड लाख खेडय़ात गाडय़ा विक्रीस उपलब्ध करून देणार आहोत, गेल्या वर्षी सव्वा लाख खेडय़ात विक्री करण्यात आली होती. मागणी कमी होत असल्याने आता ग्रामीण भागावर लक्ष केंद्रित केले जात आहे. सध्या कंपनीच्या गाडय़ांची एक तृतीयांश विक्री ग्रामीण भागात होत आहे. कंपनी यंदाच्या वर्षी दोन अंकी वाढीचा दर कायम ठेवण्यासाठी प्रयत्न करीत आहे. पहिल्यांदाच मोटार घेणाऱ्यांचे प्रमाण या वर्षांत ४४ टक्के आहे ते गेल्या वर्षी ते ३७ टक्के होते.
