महाराष्ट्र शासनाच्या दुग्धव्यवसाय विकास विभागांतर्गत कार्यरत असणाऱ्या दुग्धशाळा विज्ञान संस्था- आरे, गोरेगाव, मुंबई येथे दुग्धतंत्रज्ञान पदविका अभ्यासक्रमाच्या २०१७-१८ या शैक्षणिक सत्रात खालीलप्रमाणे प्रवेश उपलब्ध आहेत. आवश्यक शैक्षणिक पात्रता- अर्जदार विद्यार्थ्यांनी ते खुल्या वर्गगटातील असल्यास १०+२ शैक्षणिक अभ्यासक्रमांतर्गत बारावीची परीक्षा किमान ४५% गुणांसह उत्तीर्ण केलेली असावी व त्यांची बारावीच्या परीक्षेतील पदार्थविज्ञान, रसायनशास्त्र व गणित विषयातील गुणांची टक्केवारी किमान ५०% असायला हवी. विशेष सूचना- राखीव वर्गगटातील विद्यार्थ्यांसाठी गुणांच्या टक्केवारीची वरील अट ५% नी शिथिलक्षम आहे. जागांची संख्या व तपशील- अभ्यासक्रमासाठी उपलब्ध जागांची संख्या ४० असून त्यापैकी काही जागा सरकारी नियमांनुसार राखीव आहेत. अर्ज व माहितीपत्रक- अर्ज व माहितीपत्रक खुल्या वर्गगटातील विद्यार्थ्यांसाठी ३०० रु. (राखीव वर्गगटातील विद्यार्थ्यांसाठी १५० रु.) रोखीने भरल्यास दुग्धशाळा विज्ञान संस्था- गोरेगाव, मुंबई शिवाय पशु वैद्यकीय महाविद्यालय परभणी, उदगीर (जि. लातूर) व शिरवळ (जि. सातारा) येथे उपलब्ध आहे. अर्ज व माहितीपत्रक घरपोच हवे असल्यास संबंधित विद्यार्थ्यांनी ते खुल्या वर्गगटातील असल्यास ३५० रु. (राखीव वर्गगटातील असल्यास २०० रु) इंडियन पोस्टल ऑर्डरने विनंती अर्जासह संबंधित संस्थेच्या कार्यालयात पाठविणे आवश्यक आहे. अधिक माहिती व तपशिलासाठी संपर्क- अभ्यासक्रमाच्या संदर्भात अधिक माहिती व तपशिलासाठी दुग्धशाळा विज्ञान संस्था- मुंबईच्या दूरध्वनी क्र. ०२२- २९२७२५२२ अथवा principaldsi@gmail.com या ई-मेलवर संपर्क करावा अथवा प्रमुख वृत्तपत्रात प्रकाशित झालेली महाराष्ट्र शासन, दुग्धव्यवसाय विकास विभागाची जाहिरात पहावी. अर्ज पाठविण्याचा पत्ता व शेवटची तारीख- विहित नमुन्यातील संपूर्णपणे भरलेले व आवश्यक त्या कागदपत्रांसह असणारे प्रवेश अर्ज प्राचार्य, दुग्धशाळा विज्ञान संस्था- आरे गोरेगाव (पूर्व), मुंबई- ४०० ०६५ या पत्त्यावर ३ जुलै २०१७ पर्यंत पोहोचतील अशा बेताने पाठवावेत. राज्यातील विज्ञान विषयांसह बारावी उत्तीर्ण झालेल्या ज्या विद्यार्थ्यांना दुग्धतंत्रज्ञान विषयातील पदविका अभ्यासक्रमात प्रवेश घ्यायचा असेल अशांसाठी हा अभ्यासक्रम उपयुक्त ठरू शकतो. -दत्तात्रय आंबुलकर