प्रत्येक भारतीयाला शिक्षणाचा अधिकार आहे. कमीत कमी बालवाडी व प्राथमिक वर्गाना, शिक्षण विनामूल्य असावे; प्राथमिक शिक्षण हे गरजेचे आहे. अभियांत्रिकी व पदवीपर्यंतचे शिक्षण साधारणपणे सर्वाना उपलब्ध असावे आणि उच्चशिक्षण मात्र प्रत्येकाच्या गुणवत्तेनुसार असावे. शिक्षणाची दिशा ही माणसाच्या संपूर्ण विकासासाठी आणि त्याच्या मूलभूत अधिकारांसाठी असावी. शिक्षण अधिकाराअंतर्गत उपक्रम संवेदनशील परिस्थितीतील आणि वंचित बालकांची सर्वसमावेशक काळजी घेणे, त्यांना शिक्षण पुरवणे. बिकट परिस्थितीत राहणाऱ्या तसेच अल्पसंख्याक वर्गातील सर्व बालकांना, विशेषत: मुलींना, चांगल्या दर्जाचे शिक्षण सक्तीने व फुकट मिळेल तसेच ही मुले-मुली हे शिक्षण पूर्ण करतील हे पाहणे. जीवनविषयक कौशल्यांसंबंधीचे कार्यक्रमांचा लाभ मिळून सर्व तरुण आणि प्रौढांच्या शिक्षणविषयक गरजा भागवल्या जातील हे पाहणे. विशेषत: मुलींच्या बाबतीत प्रौढ साक्षरतेच्या प्रमाणात ५० टक्के सुधारणा घडवणे. तसेच समानतेच्या तत्त्वानुसार सर्व प्रौढांना मूलभूत व निरंतर शिक्षण मिळवून देणे. प्राथमिक व माध्यमिक शिक्षणात आढळणारा लैंगिक भेदभाव नष्ट करणे तर शिक्षणात स्त्री-पुरुष समानता आणणे. मुलींना दर्जेदार, संपूर्ण आणि समान मूलभूत शिक्षण मिळेल यावर लक्ष केंद्रित करणे. शिक्षणाच्या दर्जाशी संबंधित सर्व बाबींमध्ये सुधारणा करणे आणि गुणवत्ता सर्वांपर्यंत पोहोचेल हे पाहणे, ज्यायोगे सर्वाची होणारी शैक्षणिक प्रगती-विशेषत: साक्षरता, अंकओळख आणि जीवनविषयक कौशल्ये त्यांच्या जीवनात उपयोगी ठरतील.
