* आल्याची पेस्ट करताना आले स्वच्छ धुऊन घ्यावे. ते कोरडे करून पाणी न घालता मिक्सरमध्ये पेस्ट करून घ्यावी. त्यात थोडे मीठ व थोडे तेल घालून एकजीव करावे व घट्ट झाकणाच्या डब्यात भरून डीप फ्रिजरमध्ये ठेवावे. लागेल तेव्हा काही तास आधी फ्रिजरमधून काढून वापरून झाल्यावर पुन्हा फ्रिजरमध्ये ठेवावे. पेस्टचा रंग व चव न बदलता खूप दिवस टिकते. याच पद्धतीने हिरव्या मिरच्या व लसूण याची पेस्ट करावी.* पुदिन्याची पाने काचेच्या बाटलीत घालून फ्रिजमध्ये ठेवल्यास ८-१० दिवस चांगली राहतात. * शेंगदाण्याचा कूट करताना शेंगदाण्याला पाण्याचा हात लावून भाजावे म्हणजे दाण्याची साले पटकन निघतात. * पोळ्या, भाकरी डब्यात ठेवताना गरम भांडे ठेवण्यासाठी जे स्टॅण्ड वापरतो ते स्टॅण्ड पोळीच्या डब्यात ठेवून त्यावर पोळी, भाकरी, थालीपीठ ठेवावे. म्हणजे वाफेमुळे साचलेल्या पाण्यामुळे तळाची पोळी चिकट होणार नाही. * कढईत भाजी, पुऱ्या, भजी करण्यापूर्वी कढई पूर्णत: कोरडी करून त्यात तेल घालावे व नंतर कढई गॅसवर ठेवावी. म्हणजे तळताना पदार्थ कढईला चिकटत नाही.
