सात वर्षे कारावासाची शिक्षा आणि एक ते १०० कोटींचा दंड भारताचा नकाशा चुकीच्या पद्धतीने दाखविणाऱ्यास किमान सात वर्षे कारावासाची आणि एक ते १०० कोटी रुपयांच्या दंडाची शिक्षा होऊ शकते. काही समाजमाध्यमांवर जम्मू-काश्मीर आणि अरुणाचल प्रदेश ही राज्ये अनुक्रमे पाकिस्तान आणि चीनचा भाग असल्याचे दाखविण्यात आल्याचे प्रकार घडल्याच्या पाश्र्वभूमीवर सरकारने हा उपाय प्रस्तावित केला आहे. काश्मीर भौगोलिकदृष्टय़ा चीनमध्ये, तर जम्मू पाकिस्तानमध्ये असल्याचे अलीकडेच ट्विटरवर दाखविण्यात आले होते. त्याचा भारत सरकारने निषेध केला होता. त्यानंतर ही चूक सुधारण्यात आली होती. भूस्थानिक माहिती नियमन विधेयक २०१६ च्या मसुद्यानुसार, भारताची भूस्थानिक माहिती घेण्यापूर्वी, ती प्रकाशित करण्यापूर्वी अथवा वितरित करण्यापूर्वी सरकारची पूर्वपरवानगी घेणे बंधनकारक आहे. कोणतीही व्यक्ती भारताबद्दलची चुकीची माहिती प्रकाशित करू शकत नाही, त्यामध्ये आंतरराष्ट्रीय सीमांचाही समावेश करण्यात आला आहे. याचे उल्लंघन करणाऱ्यास शिक्षा ठोठावण्यात येईल, असे विधेयकाच्या मसुद्यात म्हटले आहे.