पुलवामा जिल्ह्य़ांत पोलीस आणि लष्करासमवेत झालेल्या चकमकीत शनिवारी लष्कर-ए-तोयबाचा कडवा दहशतवादी इर्शाद ठार झाला. त्याच्यावर १० लाख रुपयांचे इनाम जाहीर करण्यात आले होते. इर्शाद हा पुलवामा जिल्ह्य़ातील काकापोरा येथील रहिवासी असून जून २०१३ मध्ये हैदरपोरा परिसरात लष्कराच्या आठ जवानांच्या हत्याकांडप्रकरणी तो हवा होता. त्याने लष्कर आणि पोलिसांवर अनेक हल्ले केले होते, असे अधिकृत सूत्रांनी सांगितले. काकापोर येथील बेगम बाग परिसरात काही दहशतवादी असल्याची खबर मिळाल्यावरून पोलिसांनी तेथे शोधसत्र सुरू केले त्या वेळी झालेल्या चकमकीत इर्शाद ठार झाला. अनेक हल्ल्यांप्रकरणी तो हवा होता, असे पोलिसांनी सांगितले. या परिसरात दडून बसलेल्या दहशतवाद्यांनी पोलीस पथकावर गोळाबार सुरू केला. त्यामुळे लष्कराला पाचारण करण्यात आले आणि संयुक्त मोहीम हाती घेण्यात आली आणि त्यामध्ये इर्शाद ठार झाला. हैदरपोरा आणि एका हॉटेलवर करण्यात आलेल्या हल्ल्यात त्याचे नाव पुढे आल्याने सुरक्षारक्षकांनी त्याचा शोध घेण्याची मोहीम अधिक तीव्र केली होती.
