ठाणे जिल्ह्यातील प्राथमिक शाळांमधील अतिरिक्त शिक्षक व शिक्षकेतर कर्मचाऱ्याचे समायोजन तातडीने करून त्यांना थकीत वेतन अदा करण्याचे निर्देश शालेय शिक्षण विभागाने जिल्ह्यातील प्राथमिक शिक्षण अधिकाऱ्यांना दिले आहेत. तातडीने कार्यवाही पूर्ण न झाल्यास संबंधित शिक्षण अधिकारी यांचे वेतन थांबविण्यात येईल, असे आदेश शालेय शिक्षण विभागाने काढले आहे.२१ मार्च रोजी पुण्यात शिक्षण आयुक्तांनी या शिक्षक व शिक्षकेतर कर्मचाऱ्यांचे समायोजन तातडीने करण्याच्या सूचना संबंधितांना दिल्या असून सिंधी, मराठी, गुजराती, कन्नड व तेलगु माध्यमातील शिक्षकांचे समायोजन यामध्ये होणार आहे. तसेच अतिरिक्त शिक्षकेतर कर्मचाऱ्यांचे माध्यमिक, उच्च माध्यमिक शाळांमध्ये समायोजन करण्याचे आदेश दिले आहेत. या सर्व अतिरिक्त शिक्षक व शिक्षकेतर कर्मचाऱ्यांचे थकीत वेतनही तातडीने काढण्याचे आदेश दिले आहेत. या प्रकरणी शिक्षक आमदार रामनाथ मोते यांनी सातत्याने पाठपुरावा केल्याची माहिती शिक्षक परिषदेचे मुंबई उत्तर विभागाचे अध्यक्ष अनिल बोरनारे यांनी सांगितले.
