सेवेत असताना मृत्यू झालेल्या राज्यातील शेकडो शिक्षक व शिक्षकेतर कर्मचाऱ्यांच्या ६८५ कुटुंबीयांना अखेर चार कोटी रुपयांचा आर्थिक निधी मंजूर करून राज्य सरकारने दिलासा दिला आहे.ही रक्कम तातडीने शिक्षणाधिकाऱ्यांच्या मार्फत वितरित करण्यात येणार आहे. सेवेत असताना मृत्यू झालेल्या शिक्षक व शिक्षकेतर कर्मचाऱ्यांच्या कुटुंबीयांना आर्थिक मदत दिली जाते. मात्र, गेली पाच वर्षे निधीअभावी ही मदत मिळत नव्हती. शिक्षक परिषदेचे कार्याध्यक्ष व आमदार रामनाथ मोते यांनी अर्थमंत्री सुधीर मुनगुंटीवार यांना भेटून गेली अनेक वर्षे थकीत असलेली ही रक्कम कुटुंबीयांना वितरित करण्याची मागणी केली होती.अनुदानित संस्थांमधील प्राथमिक, माध्यमिक व उच्च माध्यमिक शिक्षक-शिक्षकेतर कर्मचाऱ्यांचा सेवेत असताना त्यांच्या कुटुंबीयांना तातडीने ६० हजार रुपये विशेष आर्थिक साहाय्य म्हणून दिले जातात; परंतु निधीची तरतूद नसल्याने रायगड जिल्हय़ातील २५, जळगावमधील ५०, रत्नागिरीतील ८, ठाण्यातील ७ अशी तब्बल ६८५ कुटुंबे या मदतीपासून वंचित होती. त्यांना अखेर ही मदत देण्याचा निर्णय सरकारने घेतल्याने दिलासा मिळाला आहे.
