दारूच्या नशेत झालेल्या वादातून डोक्यात दगड घालून हॉटेल कामगाराचा सहकारी मित्रांनी खून केल्याप्रकरणी राजारामपुरी पोलिसांनी एकास सोमवारी अटक केली. संतोष रघुनाथ सोनवणे (वय २४, रा. बी वॉर्ड, जवाहरनगर) असे संशयित आरोपीचे नाव आहे. ११ एप्रिल रोजी राजेंद्र बाळकृष्ण पानसरे (वय २८, रा. बारामती) याचा मंचर (जि. ठाणे) येथील आशा हॉटेलमध्ये खून करण्यात आला होता. या प्रकरणी मंचर पोलिसांनी संतोषचा साथीदार कांताराम केदार मुरबाड याला अटक केली आहे. मंचर (जि. ठाणे) येथील आशा हॉटेलमध्ये संतोष, राजेंद्र व कांताराम वेटर म्हणून कामास होते. सोमवारी रात्री उशिरा काम आटोपल्यानंतर तिघेही खोलीमध्ये मद्यप्राशन करत बसले होते. या वेळी दारूच्या नशेत या राजेंद्रचा संतोष व कांताराम यांच्यासोबत वाद झाला. यातून शाब्दिक चकमक उडाली. या रागातूनच चिडून संतोष व कांताराम यांनी राजेंद्रकुमारला लाथाबुक्क्यांनी मारहाण केली. संतोषने खोलीबाहेरील मोठा दगड उचलून राजेंद्रच्या डोक्यात घातला. यामध्ये राजेंद्र मृत झाला. दोघांनी राजेंद्रचा मृतदेह शेजारीच असणाऱ्या कॅनॉलमध्ये फेकून दिला. यानंतर घटनास्थळी असलेले रक्ताचे डागही मिटवून टाकले. खुनानंतर पहाटेच्या सुमारास कांताराम व संतोषने हॉटेलमधून पलायन केले. मंचर पोलिसांनी कांतारामला अटक केली. मात्र संतोष घटनेनंतर पसार झाला होता. सोमवारी संतोषला ताब्यात घेतले असता त्याने गुन्ह्याची कबुली दिली. तीन दिवस सीताफळाच्या झाडावर राजेंद्र पानसरे याचा खून केल्यानंतर संतोष सोनवणे जवाहरनगर येथे राहण्यास आला होता. तो जास्तीत जास्त वेळ घरामध्येच बसून राहायचा. पोलीस आपल्याला पकडतील या भीतीने गेल्या तीन दिवसांपासून संतोष घराच्या मागे असणाऱ्या सीताफळाच्या झाडावर लपून बसला होता. सोमवारी पोलिसांनी संतोषला झाडावरूनच अटक केली.
