बेडकीहाळ (कर्नाटक) येथील सेंट्रींग कामगाराने येथील रेल्वे स्थानकाच्या शेडमध्ये साडीने गळफास घेऊन आत्महत्या केली. शुक्रवारी सकाळी परिख पुलानजीक असणाऱ्या शेडमध्ये ही घटना घडली. दीपक तानाजी भोसले (वय ३०, रा. बेडकिहाळ, रा. कर्नाटक) असे मृताचे नाव आहे. दीपक भोसले कोल्हापूर येथील बालगोपाल तालमीनजीक राहणाऱ्या नातेवाईकांकडे जातो, असे सांगून ९ दिवसांपूर्वी घरातून निघून गेला होता. मात्र तो अद्याप घरी परतला नव्हता. शुक्रवारी सकाळी परिख पुलानजीक असणाऱ्या शेडमध्ये लोखंडी अँगलला एकाने गळफास घेऊन आत्महत्या केल्याचे नागरिकांच्या निदर्शनास आले. त्यांनी याबाबतची माहिती शाहूपुरी पोलिसांना दिली. पोलिसांनी घटनास्थळी धाव घेऊन पंचनामा केला. मृतदेहाशेजारी असणारा मोबाईल व खिशातील कागदपत्रांच्या आधारे मृताची ओळख पटली.
