आधारकार्डसाठीची प्रक्रिया किती सहजसोपी आहे हे लोकांपर्यंत पोहोचविताना जाहिरातीसाठी धोनीचे हे छायाचित्र नक्कीच उपयुक्त ठरेल. पण आधारकार्डसाठी धोनीने प्रशासनाकडे सुपूर्द केलेला वैयक्तिक माहितीचा अर्जच सोशल मीडियावर व्हायरल करून त्याची वैयक्तिक माहिती सार्वजनिक करण्यात आल्याचा प्रकार उघडकीस आला आहे. खुद्द धोनीची पत्नी साक्षी हिने ही बाब सरकारच्या लक्षात आणून दिली. धोनी आपल्या आधारकार्डसाठी फिंगरप्रिंट्स देत असतानाचे छायाचित्र सीएससी ई-गव्हर्नन्स सर्व्हिसेसच्या ट्विटर हॅण्डलवर ट्विट करण्यात आले. पण धोनीच्या छायाचित्रासोबत त्याने फॉर्मवर पुरवलेल्या माहितीचा स्क्रिनशॉट देखील सीएससीकडून ट्विट करण्यात आला. या संपूर्ण प्रकारावर धोनीच्या पत्नीने संतप्त प्रतिक्रिया व्यक्त करून थेट केंद्रीय कायदेमंत्री रविशंकर प्रसाद यांना याबाबत जाब विचारला. ''आधारकार्डसाठीच्या अर्जावर नमूद करण्यात आलेली सर्व वैयक्तिक माहिती सार्वजनिक करण्यात आली. वैयक्तिक आयुष्य आता शिल्लक राहिले आहे का?'' असा खोचक सवाल साक्षीने रविशंकर प्रसाद यांना विचारला. साक्षीच्या या ट्विटला नेटिझन्सनेही भरभरून पाठिंबा दिला आणि तिची बाजू मांडली. सुरूवातीला रविशंकर प्रसाद यांनाही साक्षीचे नेमके म्हणणे कळले नाही. आधारकार्डवरील माहिती जाहीर असते, मग यात गोपनीयतेचा भंग कसा? असा प्रश्न त्यांना पडला. त्यानंतर साक्षीने पुन्हा एकदा रविशंकर यांना धोनीने आधारकार्डसाठी दाखल केलेला अर्जच सार्वजनिक करण्यात आला आहे. त्यात ई-मेल आयडीपासून इतर सर्व वैयक्तिक माहिती जाहीर करण्यात आल्याचे निदर्शनास आणून दिले. रविशंकर प्रसाद यांनी साक्षीच्या ट्विटची दखल घेतली. घडलेला प्रकार लक्षात आणून दिल्याबद्दल धन्यवाद, एखाद्या व्यक्तीची वैयक्तिक माहिती जाहीर करणे अवैध आहे. यावर कडक कारवाई केली जाईल, असे आश्वासन रविशंकर प्रसाद यांनी दिले. यानंतर सीएसईच्या ट्विटर हॅण्डलवरून धोनीचे ट्विट नष्ट करण्यात आले. याशिवाय, धोनीच्या पत्नीने केलेल्या तक्रारीवरून कारवाई देखील करण्याची तयारी प्रशासनाने दाखवली आहे.
