माजी क्रिकेटपटू वीरेंद्र सेहवाग आणि ब्रिटिश पत्रकार पीअर्स मॉर्गन यांच्यातील सोशल मीडियावरील वाद साऱ्या जगाला माहीत आहे. कोणत्या ना कोणत्या कारणावरून हे दोघेही एकमेकांना भिडतात. आता निमित्त झालं ते महिला क्रिकेट विश्वचषकातील भारत विरूद्ध इंग्लंड सामन्याचे. मैदानावर आपल्या आक्रमक फलंदाजीने विरोधी संघाला घाम फोडणाऱ्या सेहवागने इथंही आपला तोच रूबाब कायम ठेवला आहे. टीम इंडियाचा इंग्लंडकडून निसटता पराभव झाल्यानंतर मॉर्गनने सेहवागला डिवचण्याचा प्रयत्न केला. पण सेहवाग हा काही कच्च्या गुरूचा चेला नाही. त्यानेही मॉर्गनच्या ट्विटला चोख प्रत्युत्तर दिले. विश्वचषकातील अंतिम सामन्यात इंग्लंडच्या महिलासंघाकडून भारताचा थोडक्यात पराभव झाल्यानंतर मॉर्गनने लगेचच सेहवागला डिवचले. त्याने थेट काहीही भाष्य न करता एक ट्विट करत, सेहवाग तू बरा आहेस ना, असा बोचरा सवाल केला. या ट्विटकडे सेहवागने दुर्लक्ष करणे अशक्यच होते. त्यानेही त्याला चोख प्रत्युत्तर दिले. संपूर्ण देशाला टीमच्या कामगिरीचा अभिमान आहे. या संपूर्ण मालिकेत आमच्या महिला संघाने सर्वोत्तम खेळी केली आहे. पराभूत होऊनही आम्हाला आमच्या मुलींचा अभिमान आहे. आमच्या टीमने चांगली लढत दिली आहे. यामुळे आमचे महिला क्रिकेट निश्चितच आणखी सुधरेल, असे ट्विट करत त्याने मॉर्गनला उत्तर दिले. सेहवाग आणि मॉर्गन यांच्यातील हे ट्विटरयुद्ध नवीन नाही. यापूर्वी गेल्यावर्षी ऑलिम्पिकवेळी हे दोघेही एकमेकांना भिडले होते. रिओ ऑलिम्पिकनंतर मॉर्गनने ट्विट करत, सव्वाशे कोटी लोकसंख्या असलेला देश २ पदके जिंकल्यानंतर जल्लोष करत आहे. किती लाजीरवाणे आहे हे ? असे मॉगर्नने ट्विट केले होते. त्यावेळी सेहवागने त्याला उत्तर देताना म्हटले होते की, आम्ही प्रत्येक छोट्या क्षणाचा आनंद लुटतो. परंतु, इंग्लंड ज्यांनी क्रिकेटची सुरूवात केली. अजून त्यांना विश्वचषक जिंकता आलेला नाही. किती लाजीरवाणे आहे हे ?, असा उलट सवाल त्याने केला होता. त्यानंतर मॉर्गनने पुन्हा एक ट्विट करत सेहवागला आव्हान दिले. भारत ऑलिम्पिकमध्ये सुवर्ण पदक जिंकण्यापूर्वी इंग्लंड वनडेतील विश्वचषक जिंकेल. जर असं झालं नाही तर मी १० लाख रूपये दान करेल, असे म्हटले होते.
