सर्वोत्तम सांघिक खेळ करत भारताने नेपाळचा २-० असा पराभव केला आणि या दोन संघांमधील प्रदर्शनीय फुटबॉल सामन्यात शानदार कामगिरी केली. भारताचा कर्णधार सुनील छेत्रीने २१व्या मिनिटाला भारतीय संघाचे खाते उघडले. हा गोल नोंदवत त्याने आंतरराष्ट्रीय स्तरावर भारताकडून खेळताना सर्वाधिक गोल करण्याचा मान मिळवला. त्याने ४३ गोल करत माजी कर्णधार बायच्युंग भूतियाचा ४२ आंतरराष्ट्रीय गोलांचा विक्रम मोडला. भारताचा दुसरा गोल क्लिफर्ड मिरांडाने ४९व्या मिनिटाला केला. दक्षिण आशियाई फुटबॉल स्पर्धेत नेपाळने भारतावर २-१ अशी मात केली होती. या पराभवाची परतफेड करताना भारताने सुरेख खेळ केला. भारताने नुकत्याच झालेल्या प्रदर्शनीय लढतीत फिलिपिन्सला १-१ असे बरोबरीत रोखले होते.
