आजपासून सुरू होत असलेल्या १९ वर्षांखालील वयोगटाच्या क्रिकेट विश्वकरंडक स्पर्धेत सहभागी होत असलेल्या क्रिकेटपटूंना माजी क्रिकेटपटू कपिल देव याने शुभेच्छा दिल्या आहेत. सहभागी होत असलेल्या सर्वांना शुभेच्छा! तुम्हीच आता तुमचे भविष्य निश्चित करणार आहात, असे कपिल देव याने आपल्या शुभेच्छा संदेशात म्हटले आहे. कसोटी क्रिकेट खेळणाऱ्या नऊ देशांसोबतच एकूण १६ देशांचे संघ या विश्वकरंडकामध्ये सहभागी होत आहेत. बांगलादेशातील चितगाँगमध्ये आजपासूनच या स्पर्धेला सुरुवात होते आहे. सलामीचा सामना आयोजक बांगलादेश विरूद्ध दक्षिण आफ्रिका यांच्यात रंगणार आहे. चितगाँगमधील झहूर अहमद मैदानावर हा सामना होणार आहे. यापूर्वी तीनवेळा या स्पर्धेचे विजेतेपद पटकाविणारा भारतीय संघ उद्या गुरुवारी आर्यलंडविरोधात सलामीचा सामना खेळणार आहे.
