* कोहलीच्या नाबाद ८५ धावा न्यूझीलंडविरुद्ध कसोटी मालिकेत निभ्रेळ यश मिळवल्यानंतर आत्मविश्वास दुणावलेल्या भारतीय संघाने एकदिवसीय मालिकेतसुद्धा वर्चस्व प्रस्थापित करण्याच्या दिशेने पहिले पाऊल टाकले आहे. धरमशाला येथील पहिल्या एकदिवसीय सामन्यात भारतीय संघाने न्यूझीलंडवर ६ विकेट्सने दणदणीत विजय साजरा केला. भारतीय संघाने या विजयासह पाच सामन्यांच्या एकदिवसीय मालिकेत विजयी बोहनी केली आहे. न्यूझीलंडला १९० धावांत रोखल्यानंतर भारतीय संघाकडून विराट कोहलीने नाबाद ८५ धावांची खेळी साकारून भारतीय संघाला विजय प्राप्त करून दिला. कोहलीने आपल्या भात्यातील सुरेख फटक्यांचा नजराणा पेश करत ९ चौकार आणि १ षटकार ठोकून नाबाद ८५ धावा केल्या. षटकार ठोकून कोहलीने सामन्यात भारतीय संघाच्या विजयाची नोंद केली. सामन्याचा नाणेफेक भारतीय संघाने जिंकून धोनीने प्रथम क्षेत्ररक्षणाचा निर्णय घेतला होता. भारतीय गोलंदाजांनी धोनीचा निर्णय योग्य ठरवून दाखवला. भारतीय गोलंदाजांनी आज भेदक मारा करून किवींना दोनशेच्या आत रोखले. हार्दिक पंड्याने आपल्या एकदिवसीय पदापर्णात तीन विकेट्स घेतल्या, तर अनुभवी फिरकीपटू अमित मिश्रानेही किवींच्या तीन फलंदाजांना माघारी धाडले. उमेश यादवने दोन गडी बाद केले. न्यूझीलंडच्या फलंदाजांची भारतीय गोलंदाजांसमोर त्रेधातिरपीट उडताना दिसली. किवींचा निम्मा संघ ४८ धावांतच तंबूत दाखल झाला होता. उमेश यादव आणि हार्दिक पंड्या यांच्या माऱयावर किवी निष्प्रभ ठरले. त्यानंतर फिरकीपटूंनी कमाल केली. केदार जाधव या कामचलावू गोलंदाजाने दोन विकेट्स मिळवल्या. न्यूझीलंडची स्थिती ८ बाद १०८ अशी असताना गोलंदाज टीम साऊदीने यावेळी उल्लेखनीय फलंदाजी करत अर्धशतक झळकावले. टीम साऊदीच्या अर्धशतकी साथीने टॉम लॅथमने नाबाद ७९ धावांची खेळी साकारली. या दोघांच्या अर्धशतकी भागीदारीच्या जोरावर न्यूझीलंडला १९० धावांपर्यंत मजल मारता आली. टीम साऊदीने ४५ चेंडूत ५५ धावांची खेळी करून संघाची लाज राखली. खरंतर साऊदी देखील स्वस्तात माघारी परतणार होता. उमेश यादवने लाँग लेगवर टीम साऊदीचा झेल सोडून त्याला जीवनदान दिले आणि याचा पुरेपुर फायदा घेत साऊदीने एकदीवसीय क्रिकेटमधील आपले पहिलेवहिले अर्धशतक गाठले. टीम साऊदीचे अर्धशतक आणि टॉम लॅथमच्या नाबाद ७९ धावांच्या जोरावर किवींना १९० धावा करता आल्या. प्रत्युत्तरात भारतीय संघाचे सलामीवीर रोहित शर्मा आणि अजिंक्य रहाणे दमदार फलंदाजी करत चांगली सुरूवात केली. पण मिड ऑनला मोठा फटका मारण्याच्या प्रयत्नात रोहित (१४) पायचीत झाला. तर रहाणे (३३) निष्काळजी फटका मारून यष्टीरक्षकाकरवी झेलबाद होऊ माघारी परतला. विराट कोहलीने विश्वासू फलंदाजी करत मनिष पांडेच्या साथीने भारतीय धावसंख्येला आकार दिला. मनिष पांडे ईश सोधीच्या चेंडूवर झेलबाद झाला. त्यानंतर कर्णधार धोनी आणि कोहली यांनी अर्धशतकी भागीदारी रचून विजयाच्या दिशेने कूच केली. विजयासाठी अवघ्या काही धावांची गरज असताना धोनी धावचीत झाला. तत्पूर्वी, हार्दिक पंड्याने भारतीय संघाला पहिले यश मिळवून दिले होते. पंड्याने गप्तिलला माघारी धाडले. त्यानंतर उमेश यादवच्या गोलंदाजीवर मोठा फटक मारण्याच्या नादात कर्णधार केन विल्यमसन थर्ड मॅनवर झेल देऊन बसला. अमित मिश्राने विल्यमसनचा झेल टीपला. रॉस टेलर आल्यापावलीच माघारी परतला. त्यानंतर उमेश यादवने अँडरसनचा(४) अफलातून झेल टीपून भारतीय संघाला चौथ यश मिळवून दिले. ल्यूक राँची देखील शून्यावर बाद झाला आहे. हार्दिक पंड्याच्या यॉर्कर चेंडूवर राँची उमेश यादवला मिड ऑनवर झेल देऊन बसला. यानंतर ठराविक अंतराने किवींच्या विकेट्स गेल्या. अखेरच्या टप्प्यात फक्त लॅथमला साऊदीची चांगली साथ मिळाली. Cricket Score of India vs New Zealand, संपर्ण सामन्याचे अपडेट्स -