मोहालीमध्ये भारतीय संघाने न्यूझीलंडविरुद्धच्या तिसऱया एकदिवसीय सामन्यात सात विकेट्सने दणदणीत विजय साजरा केला. विराट कोहलीच्या नाबाद १५४ धावांच्या जोरावर न्यूझीलंडच्या २८६ धावांच्या खडतर आव्हानाचा भारतीय संघाने यशस्वी पाठलाग करत विजयाची नोंद केली. भारतीय संघाने या विजयासह पाच सामन्यांच्या मालिकेत २-१ अशी आघाडी घेतली आहे. मोहालीच्या स्टेडियमवर आज कोहलीच्या नजाकती फटक्यांची आतषबाजी क्रिकेट रसिकांना पाहायला मिळाली. तर कर्णधार महेंद्रसिंग धोनीने ८० धावांचे महत्त्वपूर्ण योगदान दिले. किवींच्या आव्हानाचा पाठलाग करताना भारतीय संघाची सुरूवात निराशाजनक झाली होती. अजिंक्य रहाणे (५) हेन्रीच्या गोलंदाजीवर स्वस्तात झेलबाद झाला, तर रोहित शर्मा देखील १३ धावांवर पायचीत होऊन माघारी परतला. संघाची सलामी जोडी स्वस्तात तंबूत दाखल झाल्यानंतर कर्णधार धोनीने मैदानात येण्याचा महत्त्वपूर्ण निर्णय घेतला. धोनीने संयमी सुरूवात करून कोहलीला चांगली साथ देण्यास सुरूवात केली. हळूहळू दोघांनीही मैदानात जम बसविण्यास सुरूवात केल्यानंतर दोघांची भागीदारी फुलत गेली. धोनी आणि कोहली यांनी तिसऱया विकेटसाठी तब्बल १५१ धावांची भागीदारी रचली. धोनी ८० धावांवर झेलबाद झाला. पण त्यावेळी भारतीय संघाने सामन्यावर मजबूत पकड निर्माण केली होती. कोहलीने भारतीय संघाच्या धावसंख्येला पुढे नेत आपले २६ वे आंतरराष्ट्रीय एकदिवसीय शतक साजरे केले. सामन्याच्या अखेरपर्यंत मैदानात राहून कोहलीने भारतीय संघाला विजय प्राप्त करून दिला. ४९ व्या षटकात कोहलीने ट्रेंट बोल्टची जोरदार धुलाई केली. बोल्टच्या षटकात २२ धावा वसुल केल्यानंतर मनिष पांडेने अखेरच्या षटकात मिड ऑनवर चौकार मारून विजयावर शिक्कामोर्तब केले. पांडेने नाबाद २८ धावा केल्या. विराट कोहलीला सामनावीराच्या पुरस्काराने गौरविण्यात आले. तत्पूर्वी, भारतीय संघाने या सामन्यात पुन्हा एकदा नाणेफेक जिंकून क्षेत्ररक्षणाचा निर्णय घेतला होता. न्यूझीलंडने भारत दौऱयात तब्बल सातव्यांदा नाणेफेकीचा कौल गमावला. न्यूझीलंडच्या डावाची सुरूवात चांगली झाली होती. गप्तीलने आक्रमक रुप धारण केले होते. त्यामुळे सलामीजोडी फोडण्याची गरज असताना उमेश यादवने भारतीय संघाला पहिले यश मिळवून दिले. यादवने गप्तीलला(२७) पायचीत केले. त्यानंतर केन विल्यमसन आणि लॅथम यांनी संयमी फलंदाजी करत संघाच्या धावसंख्येला आकार देण्यास सुरूवात केली. दोघांनीही मैदानात जम बसविण्यास सुरूवात केली होती. भारतीय संघाला विकेटची नितांत गरज असताना भारतीय संघाचा कामचलावू गोलंदाज केदार जाधवने भारतीय संघाला महत्त्वपूर्ण यश मिळवून दिले. केदार जाधवने विल्यमसनला(२२) पायचीत केले. रॉस टेलर सुरूवातीला चाचपडताना दिसला पण खेळपट्टीचा नूर ओळखल्यानंतर टेलरच्या फलंदाजीला बहर आला. रॉस टेलर आणि टॉम लॅथम यांनी अर्धशतकी भागीदारी रचली. टेलर आणि लॅथम मैदानात असताना न्यूझीलंडच्या धावसंख्येची सरासरी पाहता संघ तीनशेचा आकडा गाठेल असा अंदाज होता. किवी सामन्यावर पकड निर्माण करत असल्याचे दिसत असताना अमित मिश्राने रॉस टेलरला(४४) बाद केले. धोनीने अफलातून स्टम्पिंग करून टेलरला माघारी धाडले. टेलर बाद झाल्यानंतर केदार जाधवने पुन्हा एकदा भारतीय संघाला यश मिळवून दिले. अँडरसन मोठा फटका मारण्याच्या नादात स्वस्तात झेल बाद झाला. त्यानंतर राँचीला देखील धोनीने स्टम्पिंग करून माघारी धाडले आणि सामन्याच्या ३० व्या षटकात भारतीय संघाने सामन्यात पुनरागमन केले. १५३ धावांवर ३ विकेट असणाऱया न्यूझीलंडची स्थिती ७ बाद १८० धावा अशी झाली. न्यूझीलंडची आठवी विकेट देखील स्वस्तात पडली. पण जेम्स नीशाम आणि मॅट हेन्री जोडी संघासाठी तारणहार ठरली. दोघांनी नवव्या विकेटसाठी ८४ धावांची भागीदारी रचून संघाला २५० चा आकडा गाठून दिला. जेम्स निशामने ५७ धावांची महत्त्वपूर्ण खेळी साकारली, तर हेन्रीने ३९ धावांवर नाबाद राहिला. अखेरच्या षटकाच्या चौथ्या चेंडूवर न्यूझीलंडची शेवटची विकेट पडली. किवींनी भारतीय संघासमोर विजयासाठी २८६ धावांचे आव्हान ठेवले आहे. भारतीय संघाकडून केदार जाधव आणि उमेश यादव यांनी प्रत्येकी तीन विकेट्स घेतल्या, तर बुमराह आणि मिश्रा यांनी प्रत्येकी दोन विकेट्स मिळवल्या. India vs New Zealand : दिवसभरातील अपडेट्स