वानखेडे कसोटीत इंग्लंडच्या संघाने पहिल्या दिवसाअखेरीस ५ बाद २८८ धावांपर्यंत मजल मारली आहे. इंग्लंडकडून यावेळी किटॉन जेनिंग्स याने आपल्या पदार्पणाच्या सामन्यात शतकी खेळी साकारून संघाला दमदार सुरूवात करून दिली. तर भारतीय संघाकडून नेहमीप्रमाणे फिरकीपटू आर.अश्विन याने आपल्या अफलातून फिरकीवर इंग्लंडच्या चार फलंदाजांना माघारी धाडले. अश्विनने चार, तर जडेजाने एक विकेट घेतली. भारताच्या वेगवान गोलंदाजांना यावेळी एकही विकेट मिळवता आली नाही. सामन्याचा नाणेफेक जिंकून इंग्लंडने प्रथम फलंदाजीचा निर्णय घेतला होता. कर्णधार अलिस्टर कूक आणि किटॉन जेनिंग्स यांनी संयमी फलंदाजी करत संघाला चांगली सुरूवात करून दिली. शतकी भागीदारीसाठी केवळ एका धावेची आवश्यकता असताना अॅलिस्टर कूक ४६ धावांवर बाद झाला. रविंद्र जडेजाने भारताला पहिले यश मिळवून दिले. जडेजाच्या फिरकीवर अॅलिस्टर कूक स्टम्पिंग बाद झाला. पहिल्या सत्रात इंग्लंडने १ बाद ११७ धावा केल्या. उपहारानंतरच्या खेळात जेनिंग्सने मैदानात टीच्चून फलंदाजी करत कसोटी कारकीर्दीतील आपले पहिलेवहिले शतक पूर्ण केले. अश्विनने भारतीय संघाला दुसरे यश मिळवून देत जो रुट याला स्लिपमध्ये झेलबाद केले. विराट कोहलीने जो रुटचा अप्रतिम झेल टीपला. जो रुट बाद झाल्यानंतर मोईन अली याने जेनिंग्सला चांगली साथ देत इंग्लंडच्या धावसंख्येला आकार दिला. मोईन अलीने अर्धशतक ठोकले. या दोघांनी संघाला दोनशेचा आकडा गाठून दिला. मग तिसऱया सत्रात अश्विनने एकाच षटकात जेनिंग्स आणि मोईन अली या मैदानात जम बसविलेल्या खेळाडूंना माघारी पाठवून भारतीय संघाला महत्त्वपूर्ण यश मिळवून दिले. मोईन अली ५० धावांवर झेलबाद होऊन माघारी परतला, तर जेनिंग्स ११२ धावांवर पुजाराकरवी झेलबाद झाला. पहिल्या दिवसाचा खेळ संपण्यासाठी काही षटकांचा अवधी असतानाच अश्विनने इंग्लंडच्या बेअरस्टोला चालते केले. सामन्याच्या पहिल्याच दिवशी खेळपट्टीवर फिरकीला चांगली साथ मिळत असल्याचे पाहायला मिळाले आहे. त्यामुळे दुसऱया दिवशी खेळपट्टीचा नूर कसा असेल? हे पाहणे महत्त्वाचे असणार आहे. वाचा: भुवनेश्वर कुमारचा चेंडू लागल्याने पंच पॉल रिफेल गंभीर जखमी दरम्यान, सामन्याचा ४९ व्या षटकात एक धक्कादायक प्रकार घडला. अश्विनच्या फिरकीवर इंग्लंडच्या जेनिंग्स याने स्वेअर लेगला फटका खेळला होता. भुवनेश्वर कुमार चेंडू अडवून यष्टीरक्षक पार्थिव पटेलच्या दिशेने फेकला, पण स्वेअर लेगवर उभ्या असलेल्या पंचाच्या डोक्यावर चेंडू आदळला. पंच पॉल रिफेल जखमी झाले. डोक्यावर चेंडू आदळल्याने ते जागीच कोसळले, सर्वांनी त्वरित त्यांच्याकडे धाव घेतली. स्टेडियमवर इंग्लंडच्या वैद्यकीय पथकातील फिजिओ देखील दाखल झाले. रिफेल यांना त्वरित रुग्णालयात हलविण्यात आले. मग तिसरे पंच मारीस यांनी मैदानाचा ताबा घेऊन सामना पुन्हा सुरू केला. पॉल रिफेल यांची एमआरआय चाचणी करण्यात आल्यानंतर काळजी करण्याचे कोणतेही कारण नसल्याचे सांगण्यात आले आहे. रिफेल यांना एका दिवसाचा आराम करण्याचा सल्ला डॉक्टरांनी दिला आहे. Cricket Score Updates , India v England: दिवसभरातील अपडेट्स
