रिकी भुईचे शतक आणि कर्णधार मोहम्मद कैफच्या नाबाद ८९ धावांच्या खेळीच्या जोरावर आंध्र प्रदेशने दुसऱ्या दिवसअखेर ४ बाद २१३ अशी मजल मारली आहे. पावसाच्या व्यत्ययामुळे सामन्याच्या दुसऱ्या दिवशी फक्त २६ षटकांचाच खेळ होऊ शकला. यामध्ये आंध्र प्रदेशने ४३ धावांची भर घालत दोन फलंदाज गमावले. पहिल्या दिवशीच्या २ बाद १७० धावांवरून पुढे खेळताना आंध्र प्रदेशने सावध खेळ केला. भुई आणि कैफ यांनी २१ धावांची भर घातली आणि बलविंदर सिंग संधूने ९२ व्या षटकात भुईला बाद करत ही जोडी फोडली. भुईने १३ चौकार आणि दोन षटकारांच्या जोरावर १०३ धावांची खेळी साकारली. भुईला बाद केल्यावर त्यानंतरच्याच ९४ व्या षटकात त्याने ए. जी. प्रदीपला शून्यावर बाद करत आंध्र प्रदेशला दुहेरी धक्का दिला. पण त्यानंतर मात्र कैफने संघाला सावरत सावधपणे दिवस खेळून काढला. कैफने १२ चौकार आणि एका षटकाराच्या जोरावर नाबाद ८९ धावांची खेळी साकारली आहे. संक्षिप्त धावफलक आंध्र प्रदेश (पहिला डाव) : १०६ षटकांत ४ बाद २१३ (रिकी भुई १०३, मोहम्मद कैफ खेळत आहे ८९; बलविंदर सिंग संधू ३/४५) वि. मुंबई.
