भारतीय बॅडमिंटनपटू बी. साईप्रणित, अजय जयराम आणि आनंद पवार यांनी पुरुष एकेरीत आरामात विजय मिळवून ५० हजार अमेरिकन डॉलर पारितोषिक रकमेच्या कॅनडा खुल्या ग्रां.प्रि. बॅडमिंटन स्पध्रेची दुसरी फेरी गाठली आहे. अमेरिकन खुल्या ग्रां.प्रि. गोल्ड स्पध्रेत उपांत्य फेरी गाठणाऱ्या १०व्या मानांकित साईप्रणितने स्कॉटलंडच्या अ‍ॅलिस्टर कॅसेचा २१-११, २१-१७ अशा फरकाने पराभव केला. नवव्या मानांकित जयरामने चायनीज तैपेईच्या शि कुई च्यूनला २१-१०, २१-१९ असे पराभूत केले, तर मुंबईच्या आनंद पवारने अमेरिकेच्या निकोलस वॉलरला २१-९, २१-१० अशी धूळ चारली. आरएमव्ही गुरुसाईदत्तला मात्र पराभवाचा धक्का बसला. चीनच्या शि युकीने त्याचा २१-९, २१-१४ असा पराभव केला.
