भारताची आघाडीची बॅडमिंटनपटू सायना नेहवाल पायाच्या घोटय़ाला झालेल्या दुखापतीतून सावरत असून, पुढील आठवडय़ात ती बंगळुरूला सरावाला पुन्हा सुरुवात करणार आहे, अशी माहिती तिचे वडील हरविर सिंग यांनी दिली. ‘‘सध्या हैदराबादमध्ये सायनाच्या पायाच्या घोटाला झालेल्या दुखापतीवर उपचार सुरू आहेत. चिंता करण्यासारखी दुखापत नसून, ती यातून बऱ्यापैकी सावरते आहे. पुढील आठवडय़ात बंगळुरूला ती पुन्हा सरावाला प्रारंभ करील,’’ असे हरविर सिंग यांनी सांगितले. गेल्या महिन्यात सायनाला झालेल्या दुखापतीमुळे तिला हाँगकाँग खुल्या स्पध्रेतून माघार घ्यावी लागली. याचप्रमाणे जागतिक बॅडमिंटन महासंघाच्या सुपर सीरिज फायनल्स स्पध्रेतील तिच्या कामगिरीबाबत गंभीर प्रश्नचिन्ह उपस्थित केले जात होते.
