भारताचा कसोटी कर्णधार विराट कोहलीला १०व्या ईएसपीएन-क्रिकइन्फो वार्षिक पुरस्कारांमध्ये वर्षांतील सर्वोत्तम कर्णधार या पुरस्कारासाठी निवड झाली आहे. मागील वर्षांत कोहलीच्या नेतृत्वाखालील भारताने १२ कसोटी सामन्यांपैकी ९ सामने जिंकण्याची किमया साधली. इंग्लंडच्या बेन स्टोक्सने सर्वोत्तम कसोटी फलंदाजाचा पुरस्कार पटकावला आहे. केप टाऊनमध्ये त्याने दक्षिण आफ्रिकेविरुद्ध १९८ चेंडूंत २५८ धावांची खेळी साकारली होती. वेगवान गोलंदाज स्टुअर्ट ब्रॉडने तिसऱ्या कसोटीत १७ धावांत ६ बळी घेतले आणि मालिका विजयात महत्त्वाची भूमिका बजावली. त्याने सर्वोत्तम कसोटी गोलंदाजाचा पुरस्कार मिळवला. दक्षिण आफ्रिकेच्या क्विंटन डी कॉकने ऑस्ट्रेलियाविरुद्ध १७८ धावांची खेळी साकारली. त्याची सर्वोत्तम एकदिवसीय फलंदाज या पुरस्कारासाठी निवड झाली आहे, तर वेस्ट इंडिजचा फिरकी गोलंदाज सुनील नरिन सर्वोत्तम एकदिवसीय गोलंदाज ठरला आहे. विंडीजच्या कार्लोस ब्रेथवेटने सर्वोत्तम ट्वेन्टी-२० फलंदाजाचे आणि बांगलादेशच्या मुस्ताफिझूर रेहमानने सर्वोत्तम ट्वेन्टी-२० गोलंदाजाच्या पुरस्कारावर दावा केला आहे.
