आंद्रे फ्लेचरने केलेल्या ६२ धावांच्या जोरावर वेस्ट इंडिजने दुसऱ्या ट्वेन्टी-२० सामन्यात न्यूझीलंडचा ३९ धावांनी पराभव केला आणि दोन सामन्यांची मालिका १-१ अशी बरोबरीत सोडविली. प्रथम फलंदाजी करताना विंडीजने २० षटकांत ६ बाद १६५ धावा केल्या. त्यामध्ये फ्लेचर (६२)व लिंडेल सिमोन्स (३६) यांनी फलंदाजीत चांगली चमक दाखविली. न्यूझीलंडकडून ट्रेन्ट बोल्टने २२ धावांत दोन बळी घेतले. केन विल्यम्सन (३७), ब्रेन्डन मॅक्क्युलम (२१) व रॉस टेलर (२१) यांनी दमदार खेळ करूनही न्यूझीलंड संघाचा डाव १९.१ षटकांत १२६ धावांत कोसळला. विंडीज संघाकडून शेल्डॉन कॉटरेल (३/२८) व सुनील नरीन (२/१९) यांनी प्रभावी गोलंदाजी केली.
