सार्वत्रिक निवडणुकीत एकहाती घवघवीत विजय मिळविणारे भावी पंतप्रधान नरेंद्र मोदी हे केंद्रीय मंत्रीमंडळाची निवडही एकहातीच करणार असून सर्व सूत्रे त्यांच्या हाती एकवटली आहेत. प्रादेशिक समतोल, जात वगैरे मुद्दय़ांचे दडपण झुगारून मोदी आपले सहकारी निवडणार असल्याने मंत्रिमंडळात स्थान मिळावे यासाठी दिल्लीत आलेल्या महाराष्ट्रातील खासदारांचीही निराशा झाली आहे. कॅबिनेट मंत्रिपदासाठी अडून बसलेले आरपीआयचे अध्यक्ष रामदास आठवले यांचीही निराशा होण्याची शक्यता आहे. दिल्लीत सत्तास्थापनेसाठी घडामोडींना वेग आला आहे. भाजपचे खासदार दिल्लीत दाखल झाले. पहिल्यांदाच निवडून आलेल्या खासदारांचा अपवाद वगळता सर्वच वरिष्ठ खासदारांना मंत्रिपदाची आशा आहे. ज्येष्ठ नेते गोपीनाथ मुंडे यांनी पक्षाध्यक्ष राजनाथ सिंह यांची भेट घेतली. जालन्याचे खासदार रावसाहेब दानवे, माजी आमदार पाशा पटेल यांनी गोपीनाथ मुंडे यांची भेट घेतली. राष्ट्रवादीचे नेते डॉ. विजयकुमार गावितदेखील कन्या डॉ. हिना यांच्यासमवेत दाखल झाले आहेत. विजयकुमार गावित यांनी खडसे व मुंडे यांच्याशी चर्चा केली. मात्र मोदी हेच मत्र्यांची निवड करणार असल्याने महाराष्ट्रातील नेत्यांनादेखील कुणालाही मंत्रिपदाची हमी देता येत नाही, असे भाजपच्या केंद्रीय नेत्याने सांगितले. राज्यसभा सदस्यत्व दिल्याने आठवलेंना आता कोणतेही मंत्रिपद न देण्याचा निर्णय भाजपच्या केंद्रीय नेतृत्वाने घेतला आहे. विशेष म्हणजे बहुमतापेक्षाही डझनभर जास्त खासदार स्वबळावर निवडून आल्याने आरपीआयचा मंत्रिपदासाठी विचार केला जाणार नसल्याचे संकेत भाजप श्रेष्ठींनी दिले आहेत. आठवलेंनी दबाव टाकला तरी काहीही उपयोग नाही, कारण आता सारी सूत्रे मोदींच्या हाती आहेत, अशी भूमिका भाजप नेत्यांनी घेतली आहे. २६ चा मुहूर्त?मंगळवारी होणाऱ्या भाजपच्या संसदीय मंडळाच्या बैठकीत मोदींना एकमुखाने नेता निवडण्याची औपचारिकता पूर्ण करण्यात येईल. या बैठकीत शपथविधीचा मुहूर्त निश्चित करण्यात येईल. मोदी सरकारचा शपथविधी येत्या २६ मे रोजी होण्याची शक्यता आहे. सल्लामसलत : भाजप नेत्या सुषमा स्वराज, वेंकय्या नायडू, अमित शाह, अरूण जेटली यांच्यासमवेत मोदींनी केंद्रीय मंत्रिमंडळातील संभाव्य नावांवर चर्चा केली. तत्पूर्वी भाजप नेत्यांनी नवनिर्वाचित खासदार उदित राज, मनोज तिवारी, विनय कटियार यांच्यासह संघ नेत्यांच्या भेटी घेतल्या. स्वराज लोकसभा अध्यक्ष?मोदींनी स्वराज यांना लोकसभा अध्यक्षपद स्वीकारण्याची विनंती केल्याचे समजते. या वृत्तास दुजोरा मिळू शकला नसला तरी ज्येष्ठ नेते लालकृष्ण अडवाणी यांनी सुषमा स्वराज व अनंतकुमार या आपल्या समर्थकांना महत्त्वाचे खाते देण्याचा आग्रह संघ नेत्यांकडे धरला आहे. याआधी अडवाणी यांना लोकसभा अध्यक्षपद दिले जाण्याची चर्चा होती. कारभार सुरू : केंद्रीय गृह सचिव अनिल गोस्वामी यांनी ‘गुजरात भवना’त हजेरी लावली. जम्मू काश्मीरमधील परिस्थिती, ईशान्य भारतातील सुरक्षितता तसेच नक्षलग्रस्त भागातील सद्यस्थितीची माहिती गोस्वामी यांनी मोदी यांना दिली. घटक पक्षांची बैठक : संसदीय मंडळाच्या बैठकीनंतर रालोआतील घटक पक्षांची बैठक होणार आहे. घटक पक्षांच्या या पहिल्याच बैठकीत नरेंद्र मोदी उपस्थित राहणार आहेत.
