रत्नागिरी जिल्ह्यातील लोटे औद्योगिक वसाहतीतील घरडा रासायनिक कारखान्यामध्ये गुरुवारी दुपारी भीषण स्फोट झाला. स्फोटामुळे परिसरात धुराचे साम्राज्य पसरले आहे. मुंबई गोवा राष्ट्रीय महामार्गापासून जवळच हा कारखाना असल्याने महामार्गावरूनही धुराचे लोट दिसत आहेत. प्राथमिक माहितीनुसार स्फोटात जीवितहानी झालेली नाही. पण कारखान्याचे मोठ्या प्रमाणात नुकसान झाले आहे. घटनास्थळी अग्निशामक दलाच्या गाड्या दाखल झाल्या असून, आग नियंत्रणात आणण्याचे काम सुरू करण्यात आले आहे. पोलिसही घटनास्थळी दाखल झाले आहेत. कारखान्यातील भट्टीमध्ये स्फोट झाल्याची माहिती मिळाली आहे.