मुंबई-अहमदाबाद महामार्गावर शुक्रवारी पहाटे पाचच्या सुमारास दोन मोठ्या कंटेनरमध्ये अपघात झाला. या अपघातामध्ये कंटेनरला लागलेल्या आगीत एका कंटेनरमधील चालक ठार झाला आहे. पालघर येथील कुडे गावाजवळ मुंबई-अहमदाबाद महामार्गावर कार वाहून नेणाऱ्या कंटेनरला पाठीमागून भरधाव वेगाने येणाऱ्या कंटेनरने धडक दिली. या अपघातानंतर कंटेनरने पेट घेतला. ज्या कंटेनरने मागून धडक दिली त्या कंटेनरचा चालक जागीच ठार झाला. महामार्गावर आग विझवण्यासाठी कोणतीही यंत्रणा उपलब्ध नसल्याने बराच वेळ हा मार्ग वाहतुकीसाठी बंद ठेवण्यात आला होता. परिणामी या अपघातामुळे वाहतूक कोंडी झाली होती. सूत्रांकडून मिळालेल्या वृत्तानुसार दोन्ही कंटेनर हटवण्याचे काम सुरु असून सध्या महामार्गावर केवळ एकेरी वाहतूक सुरु आहे. कंटेनर हटवल्यानंतर लवकरच वाहतूक पूर्वपदावर येईल.
