धुळ्यात वाळूची वाहतूक करणाऱ्या डंपरला अचानक आग लागल्याची घटना आज दुपारी बिलाडी रोडवरील पुलावर घडली आहे. क्षमतेपेक्षा जास्त वाळू वाहून नेणाऱ्या या डंपरला शॉर्ट सर्किटमुळे आग लागल्याची शक्यता वर्तविण्यात येत आहे. सुदैवाने या अपघातात कोणतीही जीवितहानी झाली नाही.

बिलाडी रोडवरील कुंडाणे फाट्याजवळील पांझरा नदी पुलावर आज दुपारी सव्वा बाराच्या सुमारास डंपरने पेट घटला. इंजिनमधील वायरिंगच्या शॉर्ट सर्कीटमुळे डंपरच्या पुढील बाजूस अचानक आग लागली. यावेळी डंपरमधील चालक आणि क्लिनरने समय सूचकता दाखवत गाडी थांबवून बाहेर उडी घेत स्वतःचे प्राण वाचवले. मात्र भर रस्त्यात हा डंपर पेटल्याने काही वेळासाठी या ठिकाणची वाहतूक खोळंबली होती. सुदैवाने या दुर्घटनेत कोणतीही जीवितहानी झालेली नाही.