राष्ट्रवादी काँग्रेसचे माजी प्रदेशाध्यक्ष मधुकर पिचड यांना उच्च न्यायालयाच्या औरंगाबाद खंडपीठाने दणका दिला आहे. मधुकर पिचड यांचे महादेव कोळी जातीचे जात वैधता प्रमाणपत्र खंडपीठाने रद्द केले आहे. त्यांना कोळी महादेव जातीचे प्रमाणपत्र देण्याच्या सूचना खंडपीठाने दिल्या आहेत. त्यामुळे महादेव कोळी जात दाखवून अनुसूचित जमाती अंतर्गत घेत असलेले त्यांचे आरक्षण रद्द झाले आहे. नागपूर येथील महाराष्ट्र आदिवासी मन्ना जमात मंडळाने मधुकर पिचड यांच्याविरोधात याचिका दाखल केली होती. पिचड यांच्या अनुसूचित जमात प्रमाणपत्रामुळे आदिवासी समाजाचे नुकसान झाल्याचा दावा राज्य आदिवासी मन्न जमात मंडळाने याचिकेत केला होता. खंडपीठाच्या निर्णयामुळे पिचडांना आता कोळी महादेव जातीचे प्रमाणपत्र घेऊन त्यानुसार मिळणारे फायदेच त्यांना मिळवता येतील. पिचड हे कोळी महादेव जातीचे असताना त्यांनी महादेव कोळी जातीचे प्रमाणपत्र सादर केले होते, असे आदिवासाी मन्ना जमातीने म्हटले होते. त्यामुळे हा वाद निर्माण झाला होता. या निर्णयामुळे त्यांना 'एसटी' आरक्षणांतंर्गत मिळणारे फायदे मिळणार नाहीत. मधुकर पिचड यांनी संगमनेर येथून महादेव कोळी जातीचे प्रमाणपत्र मिळवले होते.