राष्ट्रवादी काँग्रेसच्या एका नेत्याने सनदी अधिकाऱ्याशी गैरवर्तन केल्याचा प्रकार घडला आहे. रायगडच्या उरण येथील जेएनपीटीच्या प्रशासकीय विभागात घडलेली ही घटना कॅमेऱ्यात कैद झाली आहे. यामध्ये राष्ट्रवादी काँग्रेसचे नेते प्रशांत पाटील सनदी अधिकाऱ्याला शिवीगाळ करताना दिसत आहेत. या प्रकरणी पोलीस ठाण्यात गुन्हा दाखल करण्यात आला आहे. राष्ट्रवादीचे नेते प्रशांत पाटील एका सनदी अधिकाऱ्याची भेट घेण्यासाठी जेएनपीटीच्या प्रशासकीय विभागात गेले होते. यावेळी काही स्थानिक प्रश्नांवर पाटील अधिकाऱ्यांशी चर्चा करत होते. या चर्चेवेळी पाटील यांचा स्वत:वरील ताबा सुटला आणि त्यांनी सनदी अधिकाऱ्याशी गैरवर्तन करण्यास सुरुवात केली. यानंतर त्यांनी संबंधित अधिकाऱ्याला शिवीगाळदेखील केली. #WATCH NCP leader Prashant Patil abused and assaulted an official of Jawaharlal Nehru Port in Raigarh, Maharashtra (Strong language) pic.twitter.com/GHq9DXGm9n — ANI (@ANI) August 17, 2017 या प्रकरणी प्रशांत पाटील यांच्याविरोधात न्हावाशेवा पोलीस ठाण्यात तक्रार दाखल करण्यात आली आहे. याआधी गेल्या वर्षी राष्ट्रवादीचे आमदार सुरेश लाड यांनी उप जिल्हाधिकारी अभय कलगुटकर यांच्यावर हल्ला केला होता. सुरेश लाड हे कर्जत मतदारसंघाचे प्रतिनिधीत्व करतात.