राष्ट्रीय समाज पार्टीचे प्रदेशाध्यक्ष गोपीचंद पडळकर यांची कारागृहातून जामिनावर सुटका होताच समर्थकांनी मंगळवारी सांगलीसह तासगाव, आटपाडीत जल्लोषात मिरवणूक काढली. सांगलीपासून आटपाडीपर्यंत श्री. पडळकर यांच्यासमवेत १०० मोटारसायकलस्वारांनी रॅली काढून स्वागत केले. सांगली कारागृहाबाहेर कार्यकर्त्यांनी फटाक्यांची आताषबाजीही केली.मे महिन्यात खरसुंडी ता. आटपाडी येथे एका विवाह समारंभात झालेली मारामारी आणि यासंदर्भात तक्रार देणाऱ्याविरुद्ध खुनी हल्ला केल्याप्रकरणी श्री. पडळकर यांच्याविरुद्ध आटपाडी पोलीस ठाण्यात गुन्हा दाखल करण्यात आला होता. न्यायालयाने त्यांचा अटकपूर्व जामीन फेटाळल्यानंतर ते पोलिसात हजर झाले होते. गेले एक महिना ते न्यायालयीन कोठडीत होते. सत्र न्यायालयाने त्यांना काल जामीन मंजूर केल्यानंतर मंगळवारी त्यांची मुक्तता झाली. त्यांच्या सुटकेनंतर समर्थकांनी फटाक्यांची आतषबाजी केली. तासगाव आणि आटपाडी येथेही समर्थकांनी घोषणाबाजी करीत त्यांची मिरवणूक काढली.
