अलिबाग तालुक्यातील प्रसिद्ध चित्रकार रमेश लक्ष्मण जुईकर यांनी साकारलेल्या विलोभनीय चित्रांचे प्रदर्शन येत्या २ ऑगस्ट रोजी मुंबईत नेहरू सेंटरच्या कलादालनात भरविण्यात येणार आहे. जवळपास ५० चित्रांचा या प्रदर्शनात समावेश असल्याची माहिती रमेश जुईकर यांनी दिली. रमेश जुईकर हे अलिबाग तालुक्यातील शहाबाज (चौकीचा पाडा) गावचे मूळ रहिवासी आहेत. लहानपणापासूनच त्यांना चित्रं काढण्याची आवड होती. पुढे ही आवड जोपासताना कला महाविद्यालय, बांद्रा येथून त्यांनी चित्रकलेचे रीतसर शिक्षण घेतले. तालुक्यातील जनता शिक्षण मंडळाच्या सारळ माध्यमिक शाळेत चित्रकला शिक्षक म्हणून नोकरी केली. फळ्यावर विद्यार्थ्यांना निसर्गचित्र, वस्तुचित्रांचे धडे देताना आपल्या अंगभूत कलेलाही अधिक वृिद्धगत केले. चित्रकाराच्या बोटांमध्ये जादू असते. त्यांची कलादृष्टी इतरांपेक्षा वेगळी असते. रंगांच्या दुनियेत वावरताना आपल्या परिसरातील निसर्ग डोळ्यांत साठवून ठेवण्याबरोबरच तो कॅमेऱ्यात कैद केला तर अधिक काळ सोबत राहील, हे रमेश जुईकर यांनी जाणले आणि त्या दृष्टिकोनातून कॅनव्हासवर ब्रश घेऊन चित्र साकारणारे हात कॅमेऱ्याच्या लेन्सवरही सहज फिरू लागले. एका क्लिकमधून चित्रकाराबरोबरच छायाचित्रकार म्हणूनही त्यांची ओळख निर्माण झाली. निवृत्तीनंतरही त्यांनी आपल्यातला चित्रकलाकार जिवंत ठेवला. त्यांनी काढलेली विविध माध्यमांतील चित्रे पाहण्यासारखी आहेत. ग्रामीण जीवनातील खडतर कष्ट करून जगणारी माणसे, तसेच विलोभनीय निसर्गचित्रे मनावर परिणाम करून जातात. अशा विलोभनीय चित्रांचे प्रदर्शन २ ऑगस्ट ते ८ ऑगस्टपर्यंत नेहरू सेंटर कला दालनात भरविण्यात येणार आहे. हे प्रदर्शन आपल्या कलेसाठी महत्त्वाचे ठरणार असल्याचे रमेश जुईकर यांनी सांगितले.
