जेष्ठ गांधीवादीे, स्वातंत्र्यसेनानी तथा सहकार, शिक्षण व वस्त्रोद्योग महर्षी पुरुषोत्तम काळूभाई पाटील उपाख्य पी. के. अण्णासाहेब यांचे वयाच्या ९१ व्या वर्षी निधन झाले. येथील बॉम्बे रूग्णालयात उपचार सुरू असताना गुरुवारी सकाळी १० वाजून १८ मिनिटांनी त्यांची प्राणज्योत मालवली. शुक्रवारी दुपारी शहादा येथील अभियांत्रिकी महाविद्यालयाच्या प्रांगणात अण्णासाहेबांच्या पार्थिवावर अंत्यसंस्कार करण्यात येणार आहेत. शहादा तालुक्यातील मामाचे मोहिदे येथे ९ ऑक्टोंबर १९२३ रोजी अण्णासाहेबांचा जन्म झाला. बडोद्यातून वाणिज्य शाखेची पदवी आणि पुढे वकिली प्राप्त केलेल्या अण्णांनी नंदुरबार न्यायालयात काही दिवस वकिलीही केली.
