एका गुन्ह्यात कारवाई करण्यासाठी एक लाख रुपयांची लाच घेताना सांगोला पोलीस ठाण्याचे सहायक पोलीस निरीक्षक ज्ञानेश्वर तुकाराम करचे (वय ५४) यांना लाचलुचपत प्रतिबंधक विभागाच्या पथकाने सोमवारी रात्री अटक केली. ही कारवाई रात्री पावणे अकराच्या सुमाराला सांगोल्यातील हॉटेल ज्योतिर्लिंगजवळ करण्यात आली. याबाबत एका व्यक्तीने एसीबीकडे तक्रार दिली आहे. शेतजमिनीच्या भांडणात मुलाने वडिलांविरुद्ध पोलिसांत तक्रार अर्ज दिला होता. त्या अर्जाचा निपटारा करून गुन्हा दाखल न करता फाईल बंद करण्यासाठी दोन लाख रुपयांची मागणी करचे यांनी केली होती. तडजोडीने एक लाख रुपये देण्याचे ठरले. त्यानुसार सोमवारी रात्री पैसे देताना सापळा रचून करचे यांना रंगेहाथ पकडण्यात आल्याची माहिती एसीबी पथकाकडून मिळाली. सांगोला पोलिसांत रात्री उशिरापर्यंत गुन्हा दाखल करण्याचे काम सुरू होते.