नांदेड जिल्ह्यातील मुखेडचे शिवसेनेचे तालुकाप्रमुख शंकर ठाणेकर यांची नगर-बीड मार्गावर मोहा फाटा येथे धारदार हत्याराने वार करून हत्या करण्यात आली. मंगळवारी रात्री दीडच्या सुमारास नगर-बीड मार्गावरील जामखेडजवळ ही घटना घडली. लुटमार करण्याच्या हेतूने ही हत्या करण्यात आल्याचे प्राथमिक तपासात दिसून आले आहे.
ठाणेकर मंगळवारी रात्री मुखेडकडे परतत असताना मोहा फाटा येथे वाहन आडवे घालून त्यांची इन्होवा गाडी अडविण्यात आली. त्यानंतर अज्ञातांनी त्यांच्यावर हल्ला केला. त्यांच्या अंगावरील सोने, पैसे आणि त्यांची इन्होवा गाडी घेऊन मारेकरी पसार झाले. याप्रकरणी पोलीस ठाण्यात गुन्हा दाखल करण्यात आला आहे. पोलीसांनी तपासासाठी पाच पथके नेमली आहेत आणि ती विविध ठिकाणी रवाना करण्यात आली आहेत.