‘बिग बॉस’च्या सातव्या पर्वात वैमानिकाच्या वेशात आलेला सलमान खान आणि त्यानंतर विमानातील त्याचे प्रोमोज यामुळे या वेळी सेट नक्की काय असणार आहे याबद्दल अनेक तर्कवितर्क लावले जात होते. पण नुकत्याच समोर आलेल्या फोटोनुसार यंदाच्या पर्वामध्ये स्पर्धक एका अपघातग्रस्त विमानामध्ये फसणार आहेत. दरवेळीप्रमाणे यंदाही ‘बिग बॉस’चा सेट लोणावळ्याला बांधला असला तरी, यंदाच्या पर्वामध्ये आलिशान घराला रजा देण्यात आली असून स्पर्धक थेट एका विमानात अडकलेले दिसणार आहेत. विमानाच्या ‘बिझनेस’ आणि ‘इकॉनॉमी’ क्लासनुसार स्पर्धकांच्या बसण्याची व्यवस्था केलेली पाहायला मिळेल. विमानात झोपायला पलंग नसतो, तसेच या विमानातसुद्धा स्पर्धकांना पलंगाऐवजी खुच्र्यावर झोपायला लागणार आहे. त्यातच स्पर्धकांना स्वयंपाक करण्यासाठी स्वयंपाकघाराची सुविधाही नाही. त्यामुळे झोपेचा आणि जेवणाचा प्रश्न स्पर्धक आता कसे सोडवतात हे पाहायचे!त्याबरोबर नेहमीच्या घरासमोरील तरणतलाव आणि बागेऐवजी पडकी, अंधारी जागा आली आहे. त्यामुळे आता स्पर्धक या विमानातच अडकून राहतात की, त्यांना यथावकाश राहायला जागा मिळते हे कार्यक्रम पाहिल्यावरच कळेल.
