बॉलिवूडचा खिलाडी अक्षय कुमार आणि प्रियांका चोप्रा यांनी पंजाबी चित्रपटसृष्टीत एन्ट्री केल्यानंतर आता एकता कपूरनेदेखील पंजाबी चित्रपटाच्या निर्मितीसाठी सज्ज झाली आहे. 'सुपर सिंग' या चित्रपटाच्या माध्यमातून एकता, पंजाबी चित्रपटसृष्टीत आपली एक नवी ओळख निर्माण करणार आहे. या चित्रपटामध्ये ‘उडता पंजाब’ मध्ये सरताज सिंगची भूमिका साकारणाऱ्या दिलजीत दोसांझ या चित्रपटात सुपर हिरोची भूमिका साकारताना दिसेल. या चित्रपटाबाबत दिलजीतसोबतच त्याच्या चाहत्यांमध्येही उत्सुकता असेल. चित्रपटातील भूमिकेविषयी बोलताना दिलजीतने त्याची उत्सुकता बोलून दाखविली. पंजाबी प्रेक्षकांसाठी सुपर हिरोच्या अवतारातील भूमिका साकारणे ही खूप दिवसांपासून इच्छा होती, या चित्रपटामुळे आयुष्यातील ही एक स्वप्नपूर्ती होणार असल्याचे दिलजीतने म्हटले. आयुष्यातले हे स्वप्न, आवडते दिग्दर्शक अनुराग कश्यप यांच्यासोबत पूर्ण होणे ही आनंद द्विगणीत करणारी गोष्ट असल्याचेही तो म्हणाला. सुपर हिरोच्या अवतारातील दिलजीत जून २०१७ मध्ये प्रेक्षकांच्या भेटीला येणार आहे. याव्यतिरिक्त दिलजीत, अनुष्का शर्मासोबत फिल्लोरी या चित्रपटात दिसणार आहे. हा चित्रपट २४ मार्चला प्रदर्शित होईल. ‘उडता पंजाब’मधून हिंदी चित्रपटसृष्टीत पदार्पण करणाऱ्या पंजाबी सुपरस्टार दिलजीत दोसांझने यापूर्वी 'पंजाब १९८४’, ‘जाट अॅन्ड ज्युलिअट’, ‘सरदारजी- भाग १, २’, ‘अम्बरसरिया’ यांसारख्या पंजाबी चित्रपटांतून वेगळ्या धाटणीचा अभिनय सादर करत ‘देसी मुंडा’ दिलजीतनेही चाहत्यांना चांगलीच भुरळ घातली आहे. दिलजीतच्या चित्रपटांप्रमाणेच त्याची गाणीही चाहत्यांमध्ये विशेष लोकप्रिय आहेत. तेव्हा बॉलीवूडला गवसलेला हा नवीन ‘पंजाबी नायक’ बी टाउनमध्ये स्वत:ची जागा बनवण्यात नक्किच यशस्वी झाला आहे. पंजामधील त्याची लोकप्रियताही तुफान असून सुपर हिरोच्या रुपात त्याला पाहण्यासाठी चाहत्यांमध्ये उत्सुकता असेल. एकता कपूर यांना त्याचा देखील नक्कीच फायदा होईल. एकता कपूर यांच्यापूर्वी अक्षय कुमार आणि प्रियांका चोप्रा यांनी पंजाबी चित्रपट सृष्टीमध्ये रस दाखविला आहे.