पाकिस्तानी गायक नुसरत फतेह अली खान यांच्या ६७व्या जयंतीनिमित्त गुगलने त्यांच्या फोटोचे डुडल तयार करून मानवंदना दिली आहे. नुसरत फतेह अली खान यांचा जन्म १३ ऑक्टोबर १९४८ रोजी पाकिस्तानमधील पंजाबच्या लायलपूर येथे पंजाबी मुसलमान कुटुंबात झाला. कव्वाली, गझल, शास्त्रीय, पारंपारिक गायक म्हणून त्यांनी जागतिक स्तरावर नाव मिळवले. नुसरत यांच्या आवाजाची जादू भारतावरही चालली. त्यांनी गायलेली 'आफरीन आफरीन', 'मेरा पिया घर आया', 'पिया रे-पिया रे', 'सानू एक पल चैन ना आए', 'तेरे बिन' अशी अनेक गाणी आजही तितकीचं प्रसिद्ध आहेत. शिकागो येथे १९९३ साली झालेल्या रॉक कॉन्सर्टमध्ये नुसरत यांनी गाण्यास सुरुवात केली आणि अमेरिकेतील नागरिकही त्यांच्या आवाजावर फिदा झाले. मात्र, नुसरत फतेह अली खान यांना केवळ ४९ वर्षांचेच आयुष्य लाभले. लंडन येथे १६ ऑगस्ट १९९७ साली नुसरत यांनी जगाचा निरोप घेतला.
