हरियाणातील प्रसिद्ध गायिका आणि नर्तिका हर्षिता दहिया हिची मंगळवारी हत्या करण्यात आली. ती २२ वर्षांची होती. हर्षिता काल संध्याकाळी एका कार्यक्रमानंतर घरी परतत असताना तिच्यावर हल्ला करण्यात आला. फोर्ड फिगो गाडीमधून दोन अज्ञात हल्लेखोर तिचा पाठलाग करत होते. यावेळी हर्षिता आपल्या तीन मित्रांसह गाडीतून प्रवास करत होती. पानिपत परिसरात असताना हल्लेखोरांनी त्यांची गाडी अडवली आणि तिच्या सहकाऱ्यांना गाडीतून बाहेर काढले. त्यानंतर गाडीत बसलेल्या हर्षितावर हल्लेखोरांनी अगदी जवळून चार गोळ्या झाडल्या. यामध्ये तिचा जागीच मृत्यू झाला. हर्षिताला अनेक दिवसांपासून फोनवरून निनावी धमक्या येत होत्या. हर्षिताने तिच्या फेसबुक लाइव्ह चॅटमध्येही याची वाच्यता केली होती. पोलिसांनी या हत्येमागे दोन कारणे असल्याचे सांगितले. काही दिवसांपूर्वी हर्षिताने तिच्या बहिणीच्या नवऱ्यावर बलात्काराचे आरोप केले होते. याच आरोपामुळे सध्या तो तुरूंगात आहे. तसेच हर्षिताच्या आईचीही हत्या करण्यात आली होती. सध्या पोलीस या प्रकरणाचा तपास करत आहेत.
