टेलिव्हिजन विश्वात नावारुपास आल्यानंतर बऱ्याच कलाकार मंडळींनी त्यांचा मोर्चा बॉलिवूडकडे वळवला. अशाच कलाकारांच्या यादीत आता अभिनेत्री मौनी रॉयचाही समावेश झाला आहे. बऱ्याच काळापासून मौनीला सलमान खान त्याच्या चित्रपटातून लॉन्च करणार असल्याचं म्हटलं जात होतं. अशाही चर्चा रंगल्या होत्या की, ही अभिनेत्री खिलाडी अक्षय कुमारसोबत स्क्रीन शेअर करणार आहे. मौनी कोणत्या अभिनेत्यासोबत स्क्रीन शेअर करणार यावर प्रश्नचिन्ह कायम असलं तरीही ती बॉलिवूडमध्ये लवकरच पदार्पण करणार हे जवळपास निश्चित झालं आहे. आतापर्यंतच्या कारकिर्दीत आज मौनी ज्या वळणावर उभी आहे, त्या ठिकाणाहून मागे वळून पाहिलं असता तिच्या आतापर्यंतच्या प्रवासाचं सुरेख चित्र पाहायला मिळतं. मौनीने २००७ मध्ये एकता कपूरच्या 'क्यों की सास भी कभी बहू थी' या मालिकेपासून अभिनय कारकिर्दीला सुरुवात केली होती. या मालिकेनंतर तिने काही रिअॅलिटी शोमध्येही सहभागी होत प्रेक्षकांची मनं जिंकली. मौनीने 'पती पत्नी और वो', 'दो सहेलिया' आणि 'शsss फिर कोई है' या मालिकांतून अभिनय करत टेलिव्हिजन विश्वात स्वत:चं स्थान निर्माण केलं. 'देवों के देव महादेव' या मालिकेतील तिची भूमिका विशेष गाजली होती. या मालिकेदरम्यानच मौनीचं नाव मोहित रैनासोबत जोडलं गेलं होतं. कालांतराने मोहित आणि मौनीच्या प्रेमप्रकरणाच्या चर्चाही शमल्या. अभिनयासोबतच मौनी नृत्यकलेतही पारंगत आहे. यासोबतच तिने एका रिअॅलिटी शोचं सूत्रसंचालनही केलं आहे. त्यामुळे चौकटीतील विश्वातच समाधान न मानता आपल्या कक्षा रुंदावण्याला प्राधान्य देणाऱ्या या अभिनेत्रीच्या चाहत्यांचा आकडा दिवसेंदिवस वाढतच आहे.