वादग्रस्त आणि फटकळ वक्तव्यांसाठी प्रसिद्ध असणाऱ्या लेखिका शोभा डे या पुन्हा एकदा वादाच्या भोवऱ्यात सापडण्याची शक्यता आहे. शोभा डे यांनी मंगळवारी त्यांच्या ट्विटर अकाऊंटवरून मुंबईत बंदोबस्तासाठी तैनात असलेल्या एका पोलीस कर्मचाऱ्याचे छायाचित्र ट्विट केले आहे. मात्र, या छायाचित्राबरोबरचा संदेश संबंधित कर्मचाऱ्यावर शारीरिक टिप्पणी करणारा आहे. शोभा डे यांनी ट्विट केलेल्या छायाचित्रात एक वजनदार पोलीस कर्मचारी दिसत असून शोभा डे यांनी त्याला उद्देशून 'हेवी पोलीस बंदोबस्त इन मुंबई टुडे', असा काहीसा खिल्ली उडवणारा संदेश लिहला आहे. मुंबई पोलीस दलातील कर्मचाऱ्यांचे वाढलेले वजन आणि फिटनेसवर यापूर्वीही अनेकदा चर्चा झाली आहे. मात्र, शोभा डे यांनी ट्विट केल्यानंतर याप्रकरणाला भलतेच वळण लागले. पोलीस कर्मचाऱ्याची शारीरिक खिल्ली उडविल्याने अनेक ट्विटरकरांकडून शोभा डे यांच्यावर टीकेची झोड उठली आहे. यापूर्वी रिओ ऑलिम्पिकमध्ये सहभागी झालेल्या भारतीय खेळाडूंसंदर्भात वादग्रस्त वक्तव्य केल्याने शोभा डे यांना मोठ्या टीकेला सामोरे जावे लागले होते. रिओला जाऊन सेल्फी काढायचे आणि खाली हातांनी परतायचे, हेच भारतीय खेळाडूंचे रिओ ऑलिम्पिकमधील लक्ष्य आहे. भारतीय खेळाडू पैसा आणि संधी दोन्हीचा अपव्यय करत आहेत, असे डे यांनी म्हटले होते. त्यानंतर अनेक क्रीडापटू आणि सेलिब्रिटींनी डे यांना खडे बोल सुनावले होते. जेव्हा पी. व्ही. सिंधू आणि साक्षी मलिक यांनी भारतासाठी पदक मिळवले तेव्हा अमिताभ बच्चन, वीरेंद्र सेहवाग आदींनी शोभा डे यांचा समाचार घेतला होता. मात्र, त्यानंतरही या खेळाडूंना बक्षिस म्हणून बीएमडब्ल्यू दिल्यावर शोभा डे यांनी टिप्पणी केली होती. बीएमडब्ल्यूची ही चांगली जाहिरात आहे. पण या गाड्या चालवण्यासाठी खर्च कोण देणार आहे? आशा करूयात त्यांच्यासाठी या कार पांढरा हत्ती ठरू नयेत. त्यांच्या या ट्विटनंतर नव्याने ऑनलाईन वाद सुरू झाला होता. तत्पूर्वी प्राईम टाईमला मराठी चित्रपट दाखवणे अनिवार्य करण्याच्या घोषणेला विरोध केल्यामुळे शोभा डे वादाच्या भोवऱ्यात अडकल्या होत्या. मराठी चित्रपट प्राईम टाईमला दाखविण्याच्या निर्णयाला विरोध करत शोभा डे यांनी ट्विटरवरून फडणवीस सरकार हुकुमशहा प्रवृत्तीचे असल्याचे ट्विट केले होते. शिवसेना आणि राष्ट्रवादीने आक्रमक पवित्रा घेऊन हक्कभंग प्रस्ताव सादर केला होता.