टायगर श्रॉफची आई आयशा श्रॉफ गेल्या काही दिवसांपासून टायगरच्या सुरक्षेबाबत चिंतेत आहे. त्यांच्या या चिंतेचं कारण टायगरचे चाहते आहेत. अनेकदा कार्यक्रमांमध्ये चाहते टायगरच्या इतक्या जवळ येतात की कधी कधी त्याला दुखापतीचीही शक्यता असते. 'मुन्ना मायकल' चित्रपटाचे प्रमोशन करत असताना टायगरसोबत अशीच एक घटना घडली. त्यामुळे टायगरसोबत यापुढे एक नाही तर पाच सुरक्षारक्षक ठेवण्याचा विचार आयशा करत आहेत. 'मुन्ना मायकल'च्या प्रमोशनसाठी टायगर अहमदाबादमध्ये परफॉर्मन्ससाठी गेला होता. एका मॉलमध्ये टायगरला चाहत्यांनी घेरलं. त्याचा सुरक्षारक्षक यावेळी गाडी आणण्यासाठी गेला होता. चाहत्यांची वाढती संख्या पाहता टायगरला अखेर तेथून पळावं लागलं. या घटनेत त्याच्या पाठीला दुखापतही झाली. या घटनेसंदर्भात जेव्हा टायगरच्या आईला कळालं तेव्हा त्यांनी यापुढे त्याच्यासोबत पाच सुरक्षारक्षक ठेवण्याचा निर्णय घेतला. पाच सुरक्षारक्षकांशिवाय टायगर बाहेर पडणारच नाही असा नियम त्यांनी केला. वाचा : मादाम तुसाँमध्ये खुलणार मधुबालाचं हास्य टायगर श्रॉफचा 'मुन्ना मायकल' हा चित्रपट २१ जुलै रोजी प्रदर्शित झाला. दोन दिवसांत चित्रपटाने १२.८० कोटींची कमाई केली असून बॉक्स ऑफिसवर चित्रपटाला थंड प्रतिसाद मिळतोय. 'स्टुडंट ऑफ द इअर २' मध्येही टायगर भूमिका साकारणार असून चंकी पांडेची मुलगी अनन्या पांडे या चित्रपटातून बॉलिवूडमध्ये पदार्पण करणार आहे. त्यानंतर 'बागी २' चित्रपटातही टायगर दिशा पटानीसोबत भूमिका साकारणार आहे.
