बॉलिवूड अभिनेता विनोद खन्ना यांचं प्रदीर्घ आजाराने निधन झालं आहे. विनोदजींच्या निधनानंतर अनेकांनीच त्यांना श्रद्धांजली वाहात त्यांच्या आठवणींना उजाळा दिला. विविध धाटणाचे चित्रपट साकारणाऱ्या या अभिनेत्याने अभिनय क्षेत्रात एका खलनायकी भूमिकेतून पदार्पण केलं होतं. १९६८ मध्ये प्रदर्शित झालेल्या 'मन का मीत' हा विनोदजींचा पहिला चित्रपट होता. २२ व्या वर्षी ज्यावेळी विनोदजींनी 'मन का मीत' या चित्रपटातून बॉलिवूडमध्ये पदार्पण केलं होतं तेव्हा त्यांच्या भूमिकेला अपेक्षित यश मिळालं नसलं तरी त्यांची देहबोली आणि व्यक्तीमत्त्व सर्वांनाच भावलं. 'मन का मीत' नंतर विनोद खन्ना यांनी बऱ्याच चित्रपटांमध्ये नकारात्मक भूमिका साकारल्या. परंतु, नकारात्मक भूमिका साकारणाऱ्या या अभिनेत्याने प्रेक्षकांच्या मनावर चांगलीच छाप पाडली. खलनायकी भूमिकांनंतर विनोद खन्ना यांनी सहाय्यक अभिनेत्याच्या भूमिकांतूनही आपला ठसा उमटवायला सुरुवात केली. १९७१ मध्ये ‘हम तूम और वो’ या चित्रपटात त्यांनी पहिल्यांदा मुख्य अभिनेता म्हणून काम केले. विनोद खन्ना यांनी ‘मेरे अपने’, ‘कुर्बानी’, ‘पूरब और पश्चिम’, ‘रेशमा और शेरा’, ‘हाथ की सफाई’, ‘हेरा फेरी’, ‘मुकद्दर का सिकंदर’, ‘अमर, अकबर, अँथनी’ या सिनेमांमधील भूमिकांनी लोकांची भूरळ घातली. (सर्व छायाचित्रे - एक्स्प्रेस आर्काइव्ह्ज )