सध्या हिंदी चित्रपटसृष्टीत दीपिका पदुकोनच्याच नावाची चर्चा सुरु आहे. ‘xXx- द रिटर्न ऑफ झेंडर केज’ या चित्रपटाच्या निमित्ताने दीपिका चर्चेत आहे. पण, दीपिकासोबतच अाणखी एक नाव सध्या प्रचंड चर्चेत आहे. ते नाव म्हणजे अभिनेता विन डिझेलचे. या आगामी चित्रपटाच्या निमित्ताने भारतात आलेल्या हॉलिवूडच्या या अॅक्शन स्टारसाठी बॉलिवूडविश्व आणि खुद्द दीपिकाही सज्ज झाली आहे. विन डिझेल भारत दौऱ्यावर आला असल्यामुळे सध्या चाहत्यांमध्येही प्रचंड उत्साहाचे वातावरण पाहायला मिळत आहे. विनचे मुंबईत आगमन होताच पारंपारिक महाराष्ट्रीयन वेशभूषा परिधान केलेल्या अनेक महिलांनी मोठ्या उत्साहाने विनचे मराठमोळ्या पद्धतीने स्वागत केले. दीपिका आणि विन यावेळी मोठ्या आनंदात दिसत होते. विनच्या भारत दौऱ्याची ही मराठमोळी सुरुवातच म्हणावी लागेल. दरम्यान या अफलातून हॉलिवूड अभिनेत्याच्या भारत दौऱ्यासाठी दीपिकानेच खास आयोजन केले असून त्याच्या पाहुणचारामध्ये कोणतीही कसर बाकी ठेवली जाणार नाही यावर विशेष लक्ष देण्यात येत आहे. विन डिझेल भारतात दोन दिवस थांबणार आहे. त्याच्या या दौऱ्याची संपूर्ण रुपरेषा निर्धारित असून चाहत्यांच्या भेटीगाठीपासून ते प्रसारमाध्यमांशी संवाद साधण्यापर्यंतचे कार्यक्रम आखण्यात आले असल्याचे वृत्त इंडियन एक्सप्रेसने प्रसिद्ध केले आहे. दीपिका, विन आणि ‘xXx- द रिटर्न ऑफ झेंडर केज’ या चित्रपटाचे दिग्दर्शक डीजे करुसो एका पत्रकार परिषदेत पत्रकारांना संबोधित करतील. त्यानंतर लोअर परेल, मुंबई येथील फिनिक्स मिल्समध्ये दीपिका आणि विन चाहत्यांशी संवाद साधणार आहेत. विनच्या या दौऱ्यादरम्यानच या चित्रपटाचा ग्रॅण्ड प्रिमिअरही पार पडणार आहे. बॉलिवूडच्या अनेक सेलिब्रिटींची भेट घेण्यासोबतच इतरही बहुविध कार्यक्रमांनी विन डिझेल या दौऱ्यादरम्यान व्यग्र असणार आहे. जगातील कोणत्याही देशातील प्रदर्शनापूर्वी १४ जानेवारीला हा चित्रपट भारतीय चित्रपगृहांमध्ये प्रदर्शित केला जाणार आहे. भारतामध्ये प्रदर्शित झाल्यानंतर २० जानेवारीला हा चित्रपट इतर देशात प्रदर्शित होणार आहे. या बहुचर्चित हॉलिवूड चित्रपटाव्यतिरिक्त दीपिका पदुकोण आगामी ‘पद्मावती’च्या चित्रिकरणात देखील व्यग्र आहे.