आगामी 'बादशाहो' या चित्रपटाचा ट्रेलर सध्या बराच चर्चेत आहे. या सिनेमात सनी लिओनी व इमरान हाश्मीची जाेडी एकत्र दिसणार असल्यामुळे प्रेक्षकांसाठी ही एक विशिष्ट पर्वणीच असेल. नुकताच ट्विटर चॅट दरम्यान त्या दोघांनी सिनेमातील 'पिया मोरे' या दुसऱ्या गाण्याचे नाव उघड केले. पण त्याआधी त्यांच्यात काही शाब्दिक देवाणघेवाण झाली. ''मी आणि लाज कधीच एकत्र येऊ शकत नाही, हे तुम्हाला मान्य आहे का? असे इमरानने लिहीले'' त्याला लगेचच उत्तर देत सनी म्हणाली, ''तू निश्चितच भोळसट नाहीस" असे तिने लिहिले आहे. त्यानंतर 'दिल चुराने आ रहा हू कल' असे म्हणत इमरानने उद्या 'पिया मोरे' हे दुसरे गाणे येईल, असे सांगितले. या चित्रपटातील ‘मेरे रश्के कमर’ हे गाण सध्या सोशल मिडीयावर प्रचंड गाजत आहे. इलियाना डिक्रूझ आणि अजय देवगण यांची केमिस्ट्री या गाण्यातून पाहायला मिळत आहे. मनोज मुंतशिर यांच्या लेखणीतून साकारण्यात आलेल्या या गाण्यात प्रसिद्ध सुफी गायक नुसरत फतेह अली खान आणि राहत फतेह अली खान यांच्या आवाजामुळे चार चाँद लावत आहेत. ट्रेलर पाहता 'पिया मोरे' हे गाण आपल्या अपेक्षा उंचावेल, असेच सध्या वाटत आहे. ‘बादशाहो’ एक अॅक्शन थरारपट असून मिलन लुथरिया यांनी सिनेमाचे दिग्दर्शन केले आहे. यामध्ये अजय देवगण, इमरान हाश्मी, विद्युत जामवाल, संजय मिश्रा, इशा गुप्ता आणि इलियाना डिक्रूझ यांच्या मुख्य भूमिका आहेत. १ सप्टेंबर रोजी हा चित्रपट प्रेक्षकांच्या भेटीला येणार आहे.