'सैराट' या चित्रपटामध्ये आर्चीची भूमिका साकारणारी रिंकू राजगुरू हिची लोकप्रियता दिवसेंदिवस वाढताना दिसते आहे. एखाद्या सार्वजनिक ठिकाणी आर्चीला पाहण्यासाठी झालेली तुफान गर्दी असो किंवा आर्चीचा शाळेतला पहिला दिवस अशा अनेक बातम्यांमुळे रिंकू सतत प्रसिद्धीच्या झोतात आहे. आता यामध्ये आणखी एका गोष्टीची भर पडली आहे, ती म्हणजे 'आर्ची' साडीची. आपल्याकडे लोकप्रिय व्यक्तींची छबी असलेले कपडे परिधान करणे काही नवीन गोष्ट नाही. त्यामुळेच आता मुंबईमध्ये आर्ची साडीचा नवा ट्रेंड आला आहे. चित्रपटात सक्षम स्त्री भूमिका साकारणाऱ्या आर्चीचे छायाचित्र असलेल्या साड्या परिधान केलेला स्त्री-वर्ग शहरात काही ठिकाणी दृष्टीस पडतो आहे. यापूर्वी लोकसभा निवडणुकांच्यावेळी अशाच प्रकारे नरेंद्र मोदींची छबी असलेल्या साड्या बाजारपेठेत आल्या होत्या. या प्रकाराची चांगली चर्चादेखील रंगली होती. त्यानंतर आता नव्याने आलेला आर्ची साड्यांचा ट्रेंड कितपत लोकप्रिय होणार याकडे, अनेकांचे लक्ष लागले आहे.
