बॉलिवूडच्या तारे-तारकांना ग्लॅमरस लूकमध्ये टिपत त्यांना स्टारडम बहाल करणारे प्रसिध्द छायाचित्रकार जगदीश माळी यांचे सोमवारी प्रदीर्घ आजाराने निधन झाले. नानावटी रुग्णालयात त्यांच्यावर उपचार सुरू होते. सोमवारी सकाळी ११ वाजता साठीतील या कलंदर छायाचित्रकाराने अखेरचा श्वास घेतला. त्यांच्यावर सायंकाळी उशीरा शिवाजी पार्क स्मशानभूमीत अंतिम संस्कार करण्यात आले. त्यांच्या पश्चात पत्नी आणि मुलगी अभिनेत्री अंतरा माळी असा परिवार आहे.शबाना आझमी, ओम पुरी, अनुपम खेर, इरफान खान अशा वेगळ्या पठडीतील चेहऱ्यांना लोकांच्या समोर आणून त्यांच्यासाठी रुपेरी पडद्याची वाट सोपी करणाऱ्या माळी यांनी ८०च्या दशकापासून अनेक तारेतारकांची छबी आपल्या कॅमेऱ्यात टिपली. १९९८मध्ये त्यांना यकृताचा आजार झाला होता. मात्र त्यानंतर त्यांची तब्ब्येत ठणठणीत असल्याचे सांगण्यात आले होते. याच यकृताच्या दुखण्याबरोबरच त्यांना नंतर आतडय़ाचा त्रासही सुरू झाला आणि त्याचमुळे त्यांचे निधन झाल्याचे सूत्रांनी सांगितले.