चारित्र्याच्या संशयावरून पत्नी आणि दीड वर्षांच्या मुलीची चाकूने हत्या करून आत्महत्येचा प्रयत्न करणाऱ्या चंद्रकांत आयरे (३५, रा. नालासोपारा) यास वसई सत्र न्यायालयाने गुरूवारी फाशी सुनावली.चंद्रकांत याने पत्नी संचिता (२५) आणि मुलगी वैष्णवी (दीड वर्ष) या दोघींवर चाकूने हल्ला केला होता. त्यानंतर त्याने आत्महत्येचा प्रयत्न केला होता. घरातून रक्त बाहेर येऊ लागल्यामुळे शेजाऱ्यांनी पोलिसांना पाचरण केले. मे २०११ मधील या प्रकरणात चंद्रकांतला अटक झाली होती. दरम्यान, या प्रकरणाची अंतिम सुनावणी वसई सत्र न्यायालयाचे न्या. एस. जे. खैरनार यांच्यासमोर झाली. सरकारी पक्षातर्फे अ‍ॅड. उज्जवला मोहोळकर यांनी युक्तीवाद केला.
