शिवसेना चित्रपट सेनेचे चिटणीस आणि केबल व्यावसायिक श्रीकांत उर्फ राजू शिंदे यांच्यावर गोळीबार करणाऱ्या तिघांना आरे सब पोलिसांनी अटक केली आहे. एक महिन्यापूर्वी शिंदे यांनी केलेल्या मारहाणीचा वचपा घेण्यासाठी हा गोळीबार केल्याचे प्राथमिक तपासात निष्पन्न झाले आहे. या प्रकरणातील फरार असलेल्या अन्य तिघांचा शोध सुरू आहे. मोटारसायकलच्या क्रमांकावरून त्याचा मालक सुमित तळेकर (२२) याला पोलिसांनी ताब्यात घेतले. त्यानेच या गुन्ह्यासाठी मोटारसायक पुरविल्याचे निष्पन्न झाले. तो बेरोजगार आहे. सुमितने दिलेल्या माहितीवरून जुगल दोडिया (२६) आणि योगेश कोकणे या दोघांना अटक करण्यात आली. योगेशचा जोगेश्वरीत केबल व्यवसाय आहे. त्याच्या कार्यालयातून पोलिसांनी रिव्हॉल्वरही जप्त केली.
