२६/११ च्या हल्ल्यात दहशतवाद्यांच्या गोळीबारात शहीद झालेले राज्याच्या दहशतवादविरोधी पथकाचे तत्कालीन प्रमुख हेमंत करकरे यांच्या पत्नी कविता करकरे यांचे सोमवारी सकाळी निधन झाले. मुंबईतील हिंदूजा रुग्णालयाकडून त्यांना ब्रेनडेड घोषित करण्यात आले आहे. करकरे यांच्या मुलाने त्यांच्या शरीरातील अवयव दान करण्यास रुग्णालयाला परवानगी दिली आहे. शनिवारी रात्री हृदयविकाराचा तीव्र झटका आल्याने त्यांना हिंदूजा रुग्णालयात दाखल करण्यात आले होते. मात्र, त्यानंतर मेंदूतील रक्तस्रावामुळे त्या कोमात गेल्याने त्यांना कृत्रिम श्वसनयंत्रणेवर ठेवण्यात आले होते. अखेर सोमवारी सकाळी रुग्णालयाकडून त्यांना ब्रेनडेड घोषित करण्यात आले. दादर येथील पोलीस वसाहतीत राहात असलेल्या कविता करकरे शिक्षिका होत्या.