अल्पवयीन मुलीवर बलात्कार केल्याप्रकरणी शिवसेना नेते वासुदेव नांबियार (वय ६१) यांना अटक करण्यात आली आहे. सदर मुलीने एका बाळाला जन्म दिल्यानंतर हा प्रकार उघडकीस आला आहे.ठाण्यातील काशिमिरा टाऊनशीप येथील शाळेचे आणि मंदिराचे मालक असलेल्या वासुदेव नांबियार यांना शुक्रवारी अटक करण्यात आल्याची माहिती काशिमिरा पोलीस ठाण्याचे निरीक्षक अनिल कदम यांनी दिली. नांबियार चालवत असलेल्या शाळेत ही मुलगी नववी इयत्तेत शिकत होती. यादरम्यान, देवळात जाण्याच्या बहाण्याने नांबियार या मुलीला अनेकदा आपल्यासोबत नेत. त्यावेळी त्यांनी संबंधित मुलीवर बलात्कार केल्याची माहिती आहे. तसेच, याप्रकाराबाबत कुठेही वाच्यता न करण्याची धमकीही त्यांनी तिला दिली होती. मात्र, सदर घटनेनंतर ही मुलगी गर्भवती राहीली आणि तिने सात महिन्यांच्या बाळाला जन्म दिला. त्यामुळे हा सर्व प्रकार उघडकीस आला. नांबियार यांच्यावर ३७६ आणि ५०६ या कलमांतर्गत गुन्हा दाखल करण्यात आला आहे.
